Turk estradasi yulduzi Rafet El Roman 62-xalqaro gullar festivali doirasida Namanganda konsert berdi. Bu haqda “Daryo” muxbiri Azizbek Abduvaliyev hikoya qilmoqda.

Jahon miqyosidagi sanʼatkor birinchi bor Namanganga kelgani uchun bu konsertga qiziqish katta bo‘ldi.

Tomoshabinlar qatorida mahalliy muxlislardan tashqari festival mehmonlari, viloyatda faoliyat olib borayotgan turkiyalik mutaxassislarni ham uchratish mumkin edi.

Konsert oldidan Rafet El Roman “Daryo” uchun eksklyuziv intervyu berdi.

“Bundan oldin Toshkent va Samarqandda konsert bergandim, bu gal Namanganga taklif etishdi. Umuman, O‘zbekistonda juda ko‘p muxlislarim borligini bilaman. Oldinlari ulardan maktublar ham olardim. Hozir ijtimoiy tarmoqlar orqali yozishadi, qo‘shiqlarim haqida izohlar qoldirishadi. Bundan, albatta, xursandman”, — deydi xonanda.

Rafet El Roman o‘zbek madaniyati, tarixi va adabiyoti borasidagi chuqur bilimlari bilan “Daryo” muxbirini hayratga soldi.

“O‘zbekistonlik sanʼatkorlarni kuzatib boraman, ayrimlarini shaxsan taniyman. Buyuk tarixingiz, asl adabiyotingiz, ulug‘ yozuvchi va shoirlaringiz bor. Shoirlaringizdan birining sheʼrini qo‘shiq ham qilganman. Bu bizning mushtarak ildizlarimizdan dalolat beradi. Shu sabab bir-birimizning dardimizni anglaymiz, shodligimizga sherik bo‘lamiz”, — deydi Rafet El Roman.

Namangandagi konsert jonli tarzda o‘tdi. Xonanda muxlislari bilan ularga tanish va sevimli bo‘lib qolgan taronalarni birga kuyladi. Qo‘shiqlardan birida Rafet El Roman sahnadan pastga tushib, stadionda jo‘shqin raqs ham ijro etdi.

Konsert davomida Namangan viloyati hokimi Shavkat Abdurazzoqov sahnaga ko‘tarildi. U xonandaga tashrif va konsert uchun minnatdorlik bildirdi. O‘zbekona udumlarga muvofiq mehmonga to‘n va do‘ppi kiygizib, belbog‘ bog‘ladi.

Namanganda turk estradasi yulduzi ishtirokidagi ilk jonli konsert yakunlanganidan keyin ham muxlislar anchagacha tarqalmadi. Ular yanada ko‘proq qo‘shiqlarni tinglash, sevimli xonandalari bilan birga bo‘lish istagida ekanligini payqash qiyin emasdi.