Toshkentga eng ko‘p qaysi viloyatlardan ko‘chib kelingani maʼlum bo‘ldi

Toshkent shahriga eng ko‘p Toshkent va Qashqadaryo viloyatlaridan ko‘chib kelingan. Bu haqda Statistika agentligi axborot xizmati xabar berdi. 

Statistika agentligining dastlabki maʼlumotlariga ko‘ra, 2022-yilda Toshkent shahriga respublikaning boshqa hududlaridan doimiy yashash maqsadida ko‘chib kelganlar soni 45 689 kishini tashkil etgan. 2022-yilda Toshkent shahriga hududlardan doimiy yashash uchun ko‘chib kelganlar soni: 

• Toshkent viloyati – 18648 kishi;
• Qashqadaryo viloyati – 5924 kishi;
• Samarqand viloyati – 3486 kishi;
• Surxondaryo viloyati – 2853 kishi;
• Buxoro viloyati – 2777 kishi;
• Farg‘ona viloyati – 2181 kishi;
• Andijon viloyati – 1716 kishi;
• Xorazm viloyati – 1688 kishi;
• Navoiy viloyati – 1529 kishi;
• Namangan viloyati – 1521 kishi;
• Jizzax viloyati – 1303 kishi;
• Sirdaryo viloyati – 1074 kishi;
• Qoraqalpog‘iston – 989 kishi.

Avvalroq 2022–2026-yillarga mo‘ljallangan Yangi O‘zbekistonning taraqqiyot strategiyasini “Insonga eʼtibor va sifatli taʼlim yili”da amalga oshirishga oid davlat dasturiga binoan uy-joyga ega bo‘lmaganlar uchun yangi dastur ishlab chiqilishi xabar berilgandi. Shuningdek, 2022-yil yanvar oyidan boshlab Toshkent shahrida ikkilamchi uy-joylarning o‘rtacha narxi 28,3 foizga oshgani aytilgan edi. 

Bundan tashqari, Toshkent shahrida 2023-yilning 1-yanvar holatiga ko‘ra har ming kishiga o‘rtacha 193 ta yengil avtomobil to‘g‘ri kelayotgani xabar qilingan.