Jizzaxda svetoforning yashil chirog‘i 4 sekund yonayotgani haqidagi xabarga izoh berildi

Ijtimoiy tarmoqlarda Jizzax shahri Amir Temur, Islom Karimov, Saroytepa ko‘chalari kesishmasidagi svetoforning yashil chirog‘i 4 sekund yonayotgani aks etgan videolavha tarqaldi. Viloyat Yo‘l harakati xavfsizligi boshqarmasi holatga munosabat bildirdi.

Qayd etilishicha, mazkur vaziyat YHXB xodimlari tomonidan o‘rganilgan. Natijada aslida bu holat 2022-yilning dekabr oyida sodir bo‘lgani aniqlangan. O‘shanda ob-havoning namgarchiligi tufayli svetofor qurilmasida nosozlik sodir bo‘lgan.

Holat shu vaqtning o‘zida maxsus ekspluatatsiya va montaj bo‘limi xodimlari tomonidan zudlik bilan bartaraf etilgan.

“Hozirda mazkur chorrahada o‘rnatilgan svetofor qurilmasining chiroqlari belgilangan tartibda soz holatda to‘liq ishlamoqda”, — deyiladi xabarda.