Gollivud aktyori Chenning Tatum “Ruh” filmining remeykini suratga oladi
Amerikalik aktyor, prodyuser Chenning Tatumning Free Association prodyuserlik kompaniyasi rejissor Jerri Sukerning “Ruh” filmining remeykini suratga oladi. Bu haqda aktyor Vanity Fair nashriga bergan intervyusida ma’lum qildi.
Tatumning so‘zlariga ko‘ra, uning kinokompaniyasi filmni suratga olish huquqlarini qo‘lga kiritgan. Biroq aktyor remeykdan “boshqacharoq biror narsa” qilishni rejalashtirmoqda. Masalan, Tatum loyihaning yangi versiyasi “bir qator muammoli stereotiplarni” tuzatishini aytdi.
Suratga olinishi rejalashtirilayotgan filmdagi asosiy rollardan birini Tatumning o‘zi ijro etishi mumkin. U loyihaning boshqa tafsilotlarini oshkor qilmadi.
Ma’lumot uchun, “Ruh” filmining premyerasi 1990-yilda bo‘lib o‘tgan va unda Patrik Sueyzi, Demi Mur va Vupi Goldberg kabi Gollivud aktyorlari rol o‘ynagan. Film ikki marta “Oskar”, “Oltin globus”, BAFTA va boshqa bir qancha mukofotlarga sazovor bo‘lgan.
