Noyabr oyi oxirida The Sun nashri aktyor Jonni Depp “Karib dengizi qaroqchilari” franshizasining 6-qismida yana kapitan Jek chittak rolini o‘ynashi haqida xabar berdi. Garchi 2022-yilning aprel oyida aktyor unga gonorar sifatida 300 million dollar va 1 million alpaka taklif qilinsa ham, filmining davomida suratga tushmasligini ma’lum qilgandi. Franshizaning yangi qismi haqida nimalar ma'lum? Jonni Depp haqiqatan ham bosh rolda o‘ynaydimi?
Franshizaning birinchi qismi deyarli 20 yil oldin, 2003-yilda chiqarilgan. “Karib dengizi qaroqchilari: Qora marvarid tavqi la’nati” filmi Disneylenddagi mavzuli attraksionga ham asos bo‘lgandi. Premyeradan oldin jurnalistlar film muvaffaqiyatsiz bo‘lishini kutishgan, chunki o‘sha vaqtga qadar bu janr ko‘p yillar davomida muvaffaqiyat qozonmagan edi.
Ammo kutilganidan farqli o‘laroq, film ajoyib muvaffaqiyatga erishdi, ko‘plab mukofotlarga sazovor bo‘ldi, uning kassa daromadlari 650 million dollardan oshdi (2003-yildagi 4-o‘rinni egallagan film) va tanqidchilar ham ijobiy sharhlarni qoldirdilar.
Tanqidchilar va tomoshabinlar bosh rollardan biri — kapitan Jek chittakni o‘ynagan Jonni Deppning zukko va noyob ijrosini yuqori baholashdi. Sharhlovchilardan biri shunday deb yozgan edi: “Karib dengizi qaroqchilari Jonni Deppga tegishli. Agar Depp ishtirok etmasa, o‘rtamiyona va zerikarli film chiqadi”.
Jonni Depp "Eng yaxshi erkak roli" nominatsiyalarida bir nechta mukofotlarga sazovor bo‘ldi. Depp tomonidan ijro etilgan kapitan Jek chittak obrazi shu qadar taniqli va mashhur bo‘ldiki, u aktyor karyerasidagi o‘ziga xos rol bo‘lib qoldi.
Kartinaning muvaffaqiyati Walt Disney Pictures’ni trilogiya yaratishga undadi. Filmning yan ikkita davomi suratga olindi: “Karib dengizi qaroqchilari: murdalar sandig‘i” (2006) va “Karib dengizi qaroqchilari: dunyolar chegarasida” (2007). Trilogiyaning jami daromadi 2,5 milliard dollardan ortiqni tashkil etdi.
Bunday katta daromad va mashhurlik “Qaroqchilar”ning yana 2 qismini suratga olishdan boshqa yo‘l qoldirmadi: 2011-yilda “Noma’lum sohillarda” deb nomlangan 4-qism, 2017-yilda 5-qism — “Murdalar ertak aytmaydi” Umuman olganda, franshiza butun dunyo bo‘ylab 4,5 milliard dollardan ortiq daromad keltirdi.
4-qism chiqishidan biroz oldin Disney 5 va 6-filmlarni ketma-ket suratga olishni rejalashtirayotgani haqida xabar berilgan edi, garchi yakunda faqat 5-qismi chiqqan edi. To‘g‘ri, rejissor Yoaxim Renning 2017-yilda “Murdalar ertak aytmaydi” filmi sarguzashtning faqat boshlanishi ekanligini ta’kidlab, davomi albatta bo‘lishini tasdiqladi.
Ammo 2018-yilda Disney franshizaga “yangi energiya” olib kelmoqchi ekanligini aytib, Depp bilan hamkorlikni to‘xtatdi. Film rahbarlari hatto “Qaroqchilar” filmining ssenariysini yozish uchun “Dedpul” mualliflarini yollashdi. 2 yil o‘tgach esa Disney Deppning keyingi filmda hatto epizodik rolini o‘ynash g‘oyasini ko‘rib chiqishni ham rad etdi.
Muxlislar bu yangilikni g‘azab bilan qabul qilishdi, chunki “Karib dengizi qaroqchilari”ni Jek chittaksiz tasavvur qilish qiyin. Bu obraz filmlarda markaziy o‘rinni egallaydi. Muxlislar hatto 6-qismga ham aktyorni qaytarishni talab qilgan petitsiyani ham tuzishdi. Murojaat mualliflari studiya rahbariyatiga murojaat qilib, “Filmda Depp bo‘lmasa, hech kim bu film bilan qiziqmaydi”, deb yozishgan.
Yaqinda The Sun nashri 2023-yilning fevral oyida Buyuk Britaniyada franshizaning 6-qismini suratga olish boshlanishi haqida xabar berdi — bosh rolni yana Jonni Depp o‘ynaydi. Qayd etilishicha, 2023-yil oxirida 59 yoshli aktyor sinov tariqasidagi suratga olishda ishtirok etishi kerak. Film sujeti haqida hali ko‘p narsa ma'lum emas. Prodyuser Jerri Bryukxaymerning so‘zlariga ko‘ra, ssenariy ustida ish olib borilmoqda.
Manbaga ko‘ra, hammasi dastlabki bosqichda, hozircha loyihaga biriktirilgan rejissor ham yo‘q. Yangi filmning ishchi nomi — “Dengizdagi kun”. Dastlabki 3 ta filmda ishlagan Bryus Xendriks yangi loyihada ijrochi prodyuser etib tayinlandi, ammo boshqa tafsilotlar sir saqlanmoqda. Umuman olganda, Disney imkon qadar film haqidagi hamma narsani yashirmoqchi.
Eslatib o‘tamiz, aktyorning atrofidagilar The Sun bu xabarni e’lon qilgan kunning o‘zidayoq Deppning “Karib dengiz qaroqchilari” filmining yangi qismida ishtirok etishi haqidagi mish-mishlarni rad etdi. Ammo loyihaning dastlabki bosqichi, uning maxfiyligi, shuningdek, tomoshabinlarning Jonni Depp ijro etgan personajga bo‘lgan mehrini inobatga olsak, mish-mishlar tez orada rasmiylar tomonidan tasdiqlanishiga ishonish uchun asos bor. Axir, shamol bo‘lmasa daraxtning uchi qimirlamaydi.
Mavzuga doir:
Kinotavsiya: Miriqib tomosha qilishingiz mumkin bo‘lgan Jonni Depp ijrosidagi filmlar
Gollivud aktyori Jonni Depp “Karib dengizi qaroqchilari” filmining yangi qismida suratga tushmaydi
OAV: Jonni Depp “Karib dengizi qaroqchilari”dagi roliga qaytishi mumkin
Izoh (0)