Matbuot anjumani vaqtida mushukni uloqtirib yuborgan Braziliya terma jamoasi rasmiysi tanqidlarga uchradi (video)

Braziliya terma jamoasining JCH—2022 chorak finali oldidan o‘tkazilgan matbuot anjumanida ro‘y bergan holat ijtimoiy tarmoqlarda turli bahslarga sabab bo‘lmoqda.

Braziliya terma jamoasi hujumchisi Vinisius Junior savollarga javob berayotgan vaqtda stol ustiga mushuk chiqib oldi. Terma jamoa matbuot kotibi avvaliga mushukni siladi, keyin esa uning ustki qismidan ushlab pastga tashlab yubordi.

Ushbu holat ijtimoiy tarmoqlarda keng muhokamalarga va jonzotlarni himoya qiluvchi tashkilotlarning tanqidlariga sabab bo‘ldi.

Birozdan keyin mushukni uloqtirgan Vinisius Rodriges yana matbuot anjumani zaliga tashrif buyurdi. Uni jurnalistlar mushuk ovozini chiqargan holda kutib olgan. Matbuot anjumanining so‘ngida Rodriges mushukning holati yaxshi ekanini aytib o‘tgan: “Mushuk bilan hammasi joyida, xavotir olmang. U o‘zini ajoyib his qilyapti”.

Braziliya terma jamoasi chorak final o‘yinini 9-dekabr kuni Xorvatiyaga qarshi o‘tkazadi. Uchrashuv O‘zbekiston vaqti bilan 20:00 da boshlanadi.