Germaniya terma jamoasining ichki muhiti JCH—2022 vaqtida juda yomon holatda bo‘lgan.
Sport Bild nashrining xabariga ko‘ra, terma jamoa ikki qutbga — “Bavariya” futbolchilari va boshqalarga bo‘lingan. Hansi Flikning myunxenliklar vakillariga boshqacha munosabatda bo‘lishi mojaroning asosiy sababi bo‘lgan. Flik terma jamoaning barcha a’zolarida yaxshi taassurot qoldira olmagan.
Yaponiyaga qarshi 1-tur o‘yinidan (1:2) oldin muammolar boshlangan. Manuel Noyer va Leon Goretska talabi bilan terma jamoa futbolchilari mundial tashkilotchilariga o‘ziga xos norozilik bildirish uchun og‘zini yopgan holda rasmga tushgan. Boshqa futbolchilar esa har qanday siyosiy harakatlarda ishtirok etishni istamagan.
Yaponiyaga qarshi bahsda futbolchilar uchun Flikning Goretskani Ilkay Gundo‘g‘an o‘rniga maydonga tushirish qarori tushunarsiz bo‘lgan. Jamoa ichida bu qaror tanqidlarga sabab bo‘lgan. Go‘yoki bu harakat Goretska norozi bo‘lmasligi uchun amalga oshirilgan. “Manchester Siti” xavbeki esa bu qarordan g‘azablangan.
Mark-Andre ter Shtegen va Kay Havertslar zaxira o‘rindig‘ida ko‘p vaqt o‘tkazganidan norozi bo‘lgan. Ayniqsa, “Barselona” posboni klubda munosib o‘yin ko‘rsatgan bo‘lsa ham imkoniyat berilmaganidan jahli chiqqan.
“Borussiya D” himoyachisi Niklas Zyule (Flik davrida “Bavariya”da o‘ynagan) birinchi o‘yindagi qo‘pol xatolariga qaramasdan keyingi o‘yinlarda ham ishtirok etdi. Bu vaqtda Niko Shlotterbekka imkoniyat berilmadi, Mattias Ginter esa birorta o‘yinda maydonga tushirilmadi.
Germaniya terma jamoasi E guruhida 4 ochko bilan 3-o‘rinni egalladi va musobaqani tark etdi.
Izoh (0)