Матбуот анжумани вақтида мушукни улоқтириб юборган Бразилия терма жамоаси расмийси танқидларга учради (видео)

Бразилия терма жамоасининг ЖЧ—2022 чорак финали олдидан ўтказилган матбуот анжуманида рўй берган ҳолат ижтимоий тармоқларда турли баҳсларга сабаб бўлмоқда.

Бразилия терма жамоаси ҳужумчиси Винисиус Жуниор саволларга жавоб бераётган вақтда стол устига мушук чиқиб олди. Терма жамоа матбуот котиби аввалига мушукни силади, кейин эса унинг устки қисмидан ушлаб пастга ташлаб юборди.

Ушбу ҳолат ижтимоий тармоқларда кенг муҳокамаларга ва жонзотларни ҳимоя қилувчи ташкилотларнинг танқидларига сабаб бўлди.

Бироздан кейин мушукни улоқтирган Винисиус Родригес яна матбуот анжумани залига ташриф буюрди. Уни журналистлар мушук овозини чиқарган ҳолда кутиб олган. Матбуот анжуманининг сўнгида Родригес мушукнинг ҳолати яхши эканини айтиб ўтган: «Мушук билан ҳаммаси жойида, хавотир олманг. У ўзини ажойиб ҳис қиляпти».

Бразилия терма жамоаси чорак финал ўйинини 9 декабрь куни Хорватияга қарши ўтказади. Учрашув Ўзбекистон вақти билан 20:00 да бошланади.