“Daryo” kundaligida 6-dekabrda sodir bo‘lgan eng muhim voqealar
“Daryo” nashri 6-dekabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Pentagon Ukrainaga berilgan HIMARS majmualarini yashirincha o‘zgartirib, ularni Rossiya hududiga zarba berish imkoniyatidan mahrum qilgan
AQSH o‘zi Ukrainaga harbiy ko‘mak sifatida taqdim etgan HIMARS baravar o‘t ochish reaktiv tizimlarini yashirincha modifikatsiya qilib, ularni Rossiya hududlariga uzoq masofali raketalar uchirish imkoniyatidan mahrum etgan. Bu haqda The Wall Street Journal Amerika ma’muriyatidagi manbalariga tayanib xabar berdi.
Vashington Moskva bilan nizo kuchayib ketishi xavfini kamaytirish uchun shunday chora ko‘rgan, deydi gazeta suhbatdoshlari.
Xususan, modifikatsiya qilingan qurilmalardan parvoz masofasi 300 kilometrgacha bo‘lgan ATACMS raketalarini uchirish uchun foydalanib bo‘lmaydi. AQSH Ukrainaga bunday raketalarni yetkazib bermagan, biroq Kiyev ATACMS’ni boshqa manbalardan olgan taqdirda, ularni HIMARS orqali qo‘llash imkoniyatini cheklab qo‘ydi.Ukraina AQSHdan 20 ta HIMARS start qurilmalarini va parvoz masofasi 80 kilometrgacha bo‘lgan raketalarning katta zaxirasini qabul qilib olgandi. Bu raketalar Ukraina qurolli kuchlari tomonidan Rossiya bosib olgan hududlarda ularning o‘q-dori omborlari va qo‘mondonlik markazlariga zarbalar berish uchun qo‘llanadi.
Ta’kidlanganidek, HIMARS topshirilayotgan vaqtida prezident Vladimir Zelenskiy AQSHga ular Rossiya hududidagi nishonlarga zarbalar berishda qo‘llanmasligi haqida shaxsan o‘zi va’da bergan.
Mo‘g‘uliston poytaxtida ommaviy namoyishlarning ketma-ket 3 kun sodir bo‘lishi sababi nimada?
Mo‘g‘uliston poytaxti Ulan-Batorda ommaviy norozilik aksiyalari uchinchi kun ham davom etmoqda, namoyishchilar mansabdorlarni ko‘mir yetkazib berish sohasidagi korrupsiyalarda ayblamoqda. Bu haqda Mo‘g‘ulistonning Sonin nashri xabar beradi.
Mo‘g‘uliston poytaxti rahbari Dolgorsurengiyn Sumyaabazar poytaxtdagi markaziy maydonda va hukumat qarorgohi yaqinida namoyishga chiqqanlarni kuch bilan tarqatish haqida buyruq berdi.
“Bugungi namoyishlar ro‘yxatga olinmagan va ularda qatnashayotgan fuqarolar xavfsizligi to‘liq ta’minlanmagan. Shu tariqa, milliy xavfsizlikka, inson huquq va erkinliklariga zarar yetkazib, jamoat tartibini buzishi mumkin bo‘lgan tartibsizliklar munosabati bilan, tegishli moddalar asosida Ulan-Bator gubernatori aksiyalarni tarqatib yuborish haqida farmon chiqardi”, — deyiladi xabarda.
Ta’kidlanishicha, politsiyachilar olomonni tarqatish uchun kuch qo‘llashiga hojat bo‘lmagan, chunki Ulan-Batordagi namoyishlar tinch yo‘l bilan yakunlangan.
Bu orada Xitoy Tashqi ishlar vazirligi rasmiy vakili Mao Nin Xitoy tegishli so‘rov kelib tushgan taqdirda, Mo‘g‘ulistonga ehtimoliy o‘g‘riliklarni tekshirishda yordam berishga tayyorligini bildirdi.
Eslatib o‘tamiz, Mo‘g‘ulistonda 3-dekabr kuni Xitoyga eksport qilinadigan ko‘mir atrofida korrupsiya mojarosi yuz berdi.
Shimoliy Koreya janubni “provokatsion harakatlar”ni tezlikda bas qilishga chaqirmoqda
Koreya xalq armiyasi Bosh shtabi harbiylarga Janubiy Koreya va AQSH tomonidan chegara yaqinida otilgan o‘qlarga javoban, artilleriyadan o‘t ochishni buyurdi. Bu haqda Yonhap xabar bermoqda. Shimoliy Koreya harbiylari Seulni front yaqinidagi hududlarda baravar o‘t ochish reaktiv tizimlari va gaubitsalardan o‘q otishda aybladi.
“Biz jiddiy ogohlantirish berish uchun zudlik bilan old artilleriya qismlariga dengiz tomonga qarata artilleriyadan o‘t ochishni buyurdik”, — dedi Bosh shtab vakili Janubni “provokatsion harakatlar”ni tezlikda bas qilishga chaqirib.Janubiy Koreya va AQSH harbiy mashg‘ulotlari Seuldan 71 km shimoli-sharqda, Chxorvon uyezdida bo‘lib o‘tmoqda.
Shimoliy Koreya avvalroq manyovrlarga javoban, sharqiy va g‘arbiy qirg‘oq yaqinidan dengiz tomonga qarata 130 ta artilleriya snaryadlarini uchirgandi.
Avvalroq AQSH, Janubiy Koreya va Yaponiya Shimoliy Koreyaning bir qator amaldorlariga nisbatan sanksiyalar joriy qilgandi. Bu amaldorlar KXDRning qurol-yarog‘ ishlab chiqarish dasturlariga aloqador.
Endilikda o‘zbekistonliklar davlat organi va mansabdor shaxs ustidan 6 oy muddatda sudga shikoyat qilishlari mumkin
Bugun, 6-dekabr kuni Oliy Majlis Qonunchilik palatasida “Ma’muriy sud ishlarini yuritish to‘g‘risidagi kodeksiga o‘zgartish kiritish haqida”gi qonun loyihasi birinchi o‘qishda ko‘rib chiqildi.
Statistikaga ko‘ra, ma’muriy sudlar tomonidan 2021-yilda 15 mingdan ortiq ish ko‘rilgan. Shundan 5 ming 300 dan ortiq arizalarni qanoatlantirish rad etilgan. Shu arizalarning 883 tasi shikoyat qilish muddati o‘tgani sababli rad etilgan.
Majlisda Oliy sud raisi o‘rinbosari Shuhrat Polvonov qonun loyihasi haqida axborot berdi.
Bugungi kunda davlat organi qarori, mansabdor shaxs ustidan sudga shikoyat qilish uchun belgilangan muddatning qisqa ekani fuqaro va tadbirkorlik subyektlarining buzilgan huquqlarini tiklash imkonini bermayapti. Shu sababli, keng jamoatchilik, xususan, sohada faoliyat yuritib kelayotgan amaliyotchi yuristlar, huquqshunos blogerlar tomonidan bildirilgan taklif va mulohazalar, sud amaliyoti tahlili natijalaridan kelib chiqib, ushbu muddatni qayta ko‘rib chiqish va muddatni 3 oydan 6 oygacha uzaytirish taklifi ko'rilmoqda.
Shuhrat Polvonovning qo‘shimcha qilishicha, qonun loyihasi jamoatchilik muhokamasidan o‘tkazilgan va davlat byudjetidan qo‘shimcha xarajatlarni talab etmaydi.
