Ilon Mask Jo Baydenning o‘g‘li bilan bog‘liq mojaroning Twitter tomonidan xaspo‘shlanishi bo‘yicha hujjatlarning bir qismini e’lon qildi

Twitter egasi Ilon Mask o‘z profiliga ijtimoiy tarmoqning jurnalist Mett Teybbi tomonidan e’lon qilingan ichki hujjatlariga havolani joylashtirdi. Ushbu hujjatlar, shu jumladan, AQSH prezidenti Jo Baydenning o‘g‘li Xanterning noutbuki bilan bog‘liq voqea haqidagi ma’lumotni ham o‘z ichiga oladi. Mask qayd etishicha, faktlarning bir qismi e’lon qilinishidan avval ikki marta qayta tekshirilgan.

Teybbi ushbu materiallarni “Twitter fayllari” deb nomladi. Jurnalistning so‘zlariga ko‘ra, ijtimoiy tarmoqda yildan-yilga axborot tarqatish uchun to‘siqlar soni oshmoqda, ammo boshida Twitter bunday to‘siqlar bo‘lmaydigan joy sifatida o‘ylab topilgandi.

Ma’lum bo‘lishicha, Twitter Baydenlar va Ukrainaning Burisma energiya kompaniyasi o‘rtasidagi aloqalar haqidagi axborotni bekitish uchun “favqulodda choralar” ko‘rgan. Xususan, 2020-yil oktabrida New York Post nashrida bu ish haqida hamda kichik Bayden tomonidan unutib qoldirilgan va nozik axborotni o‘z ichiga olgan noutbukdan sizib chiqqan ma’lumotlar haqida xabarlar paydo bo‘lishi bilan, tvitlarni o‘chirish haqida so‘rovlar kelib tushgan — bu odatiy amaliyot sifatida qabul qilingan.

Shuningdek, bunday xabarlar “xavfsiz bo‘lmagan ma’lumot” deb belgilangan, to‘g‘ridan-to‘g‘ri havolalar esa bloklangan.

New York Post maqolasida Xanter Bayden o‘z otasi, o‘sha paytda AQSH vitse-prezidenti bo‘lgan Jo Baydenni Ukrainaning Burisma energiya kompaniyasi top-menejeri Vadim Pojarskiy bilan tanishtirib qo‘ygan, bir yildan keyin esa Jo Bayden Ukraina hukumatiga bosim o‘tkazib, kompaniya faoliyati ustidan olib borilayotgan tekshiruvga aralashishni va bosh prokurorni ishdan haydashni so‘ragan. Xanterning o‘zi Burisma direktorlar kengashi a’zosi bo‘lgan.

Maqola Xanterning Vadim Pojarskiy bilan elektron yozishmalariga asoslangan. O‘z xatlarida Pojarskiy go‘yoki kichik Baydenga uning otasi bilan uyushtirilgan uchrashuv uchun minnatdorlik bildirgan va u o‘z lavozimidan Burisma’ga yordam berish uchun qanday foydalana olishi mumkinligini so‘ragan.

Gazeta ma’lumotlariga ko‘ra, bu yozishma Delaver shtatida tuzatish uchun ustaxonaga berilgan kompyuterning qattiq diskidan olingan.

Jo Bayden “o‘g‘li bilan hech qachon uning xorijdagi ishbilarmonlik aloqalari haqida gaplashmagani”ni da’vo qilgan. Ushbu maqoladan keyin uning raqibi Tramp joriy prezidentni bu gaplari uchun yolg‘onchilikda ayblagandi.

Avvalroq AQSH Kongressi Vakillar palatasining nazorat qo‘mitasi mamlakat prezidenti Jo Baydenning oilasi 50 ta davlatda biznes yuritmoqchi bo‘lganini aniqlagan edi. Ta’kidlanishicha, AQSH prezidentining o‘g‘li Xanter dunyo bo‘ylab biznes aloqalarini yo‘lga qo‘ygan. Unga oilasining a‘zolarini kirishini ta‘minlash orqali millionerga aylanishi mumkin. Boshqa narsalar qatorida, Xanter odam savdosi bilan aloqador bo‘lishi va uning kompyuterida bunga oid dalillar borligi aytilmoqda. Oq uy mazkur ma’lumotlar ochiqlanmasligi uchun 250 ming dollardan ortiq mablag‘ sarflagani qayd etilgan.