Ilon Maskning Starlink kompaniyasi Ukraina aholisi uchun tariflarni oshirdi. Tegishli mazmundagi xatni kompaniya abonentlarga yubora boshladi, deb xabar beradi “Insayder UA”.
29-dekabrdan sun’iy yo‘ldosh interneti narxi jismoniy shaxslar uchun oyiga 60 emas, 70 dollarni tashkil qiladi.
Starlink terminali va antennasi narxi esa 500 dan 700 dollargacha oshadi.
Starlink tarmog‘i Ukrainada urush boshlanganidan keyin ko‘p o‘tmay ishga tushirilgan edi. Kommunikatsiya infratuzilmasi o‘qqa tutilishi sharoitida u mamlakat mudofaa qobiliyati uchun muhim ahamiyatga ega: undan ukrainalik harbiylar ham foydalanadi. Ayni vaqtda, kompaniya ko‘pchilik xizmatlarni bepul taqdim etmoqda.
SpaceX kuz boshida Pentagondan Ukrainada Starlink’ni moliyalashtirishni o‘z zimmasiga olishni so‘ragan, Mask xarajatlarni oyiga 20 million dollarga baholagan. Shundan keyin AQSH prezidenti ma’muriyati ittifoqdoshlar bilan Ukrainani sun’iy yo‘ldosh aloqasi bilan ta’minlash masalasini muhokama qilayotganini bildirgan. Biroq oktabr o‘rtalarida biznesmen Ukrainada aloqani bepul ta’minlashga va’da bergan.
Noyabr boshida Ukrainada moliyalashtirish bilan bog‘liq muammolar tufayli, 1,3 mingta Starlink terminallari ishlashdan to‘xtagani, bu Ukraina qurolli kuchlari uchun “ulkan muammo”ga aylangani xabar berildi. Keyinroq Ukraina Polsha hukumatidan Amerikaning SpaceX kompaniyasida ishlab chiqarilgan qo‘shimcha 1570 ta Starlink sun’iy yo‘ldosh terminallarini olgani ma’lum bo‘ldi.
Mavzuga doir:
- Rossiya Ilon Maskning Starlink sun’iy yo‘ldoshlariga zarba berish bilan tahdid qilmoqda
- “Starlink’dan voz kechmaymiz va hamkorlikni davom ettirish yo‘llarini topamiz” — Ukraina prezidenti ofisi maslahatchisi Podolyak
- Ilon Mask Starlink internet tarmog‘i barcha qit’alarda ishga tushganini e’lon qildi
Izoh (0)