Jizzaxda otasining otxonasini yoqib yuborgan yigitga nisbatan jinoyat ishi qo‘zg‘atildi

Jizzax viloyati Sharof Rashidov tumanida otxonaga o‘t qo‘yilishi oqibatida 17 bosh toy o‘lgani haqida xabar berilgandi. Bosh prokuraturaning “Daryo”ga ma’lum qilishicha, holat yuzasidan jinoyat ishi qo‘zg‘atildi.

Qayd etilishicha, “Qang‘li” mahalla fuqarolar yig‘inida istiqomat qiluvchi S.A. tumanning “Nurafshon” mahallasida yashovchi otasi A.J.ning “Yoyilma” mahallasi hududidagi otxona hamda u yerdagi mol-mulklarini ukasi A.S.ga berganidan norozi bo‘lgan.

Shu sababli mol-mulk noto‘g‘ri taqsimlandi, deb hisoblab, S.A. otxonaga 1 litr benzin sepib, yoqib yuborgan. Yong‘in oqibatida otxonaning ichida turgan, xususiyatiga ko‘ra ko‘char mulk turiga kiruvchi quyidagi:

• bozor narxi jami 102 million so‘m bo‘lgan 17 bosh 1—1,5 yoshli toylar (1 bosh toyning bozor narxi 6 mln so‘mni tashkil qiladi);
• bozor narxi jami 145 mln 700 ming so‘m bo‘lgan 4 700 dona beda press (1 dona beda pressning bozor narxi 31 ming so‘mni tashkil qiladi);
• ko‘chmas mulk turiga kiruvchi otxona binosining tom qismi yonib ketib, o‘zganing ko‘p miqdordagi mulkiga zarar yetkazilgan.

Mazkur holat yuzasidan Sharof Rashidov tumani IIB TB tergov guruhi surishtiruvchisi B.Hayitboyev tomonidan S.A.ga nisbatan Jinoyat kodeksining 173-moddasi (mulkni qasddan nobud qilish yoki unga zarar yetkazish) 2-qismi “v” bandi bilan jinoyat ishi qo‘zg‘atilib, dastlabki tergov harakatlari o‘tkazilmoqda.

Mavzuga doir:

• Toshkentdagi atir-upa do‘konini yoqib yuborgan shaxs topildi
• Qashqadaryoda teri zavodi faoliyatidan norozi fuqaro ustiga benzin sepib, o‘zini yoqib yubordi (video)