Xorazm viloyati Yangibozor tumanida garovdagi mulkini o‘zlashtirgan fermer xo‘jaligi rahbari aniqlandi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Yangibozor tuman bo‘limi tomonidan “Xalq banki” Yangibozor filialining murojaatiga asosan tergovga qadar tekshiruv o‘tkazilgan. Unda “Z.B.” fermer xo‘jaligi rahbari Z.Q. naslli qoramol sotib olishga ajratilgan 237,6 ming dollar miqdoridagi kredit ta’minoti uchun garovga qo‘yilgan 616,1 million so‘mlik issiqxonani buzib tashlagani aniqlangan. U jihozlarini boshqa maqsadlarda ishlatib yuborgan.
Holat yuzasidan Jinoyat kodeksining 233-moddasi (band solingan mulkni qonunga xilof ravishda tasarruf etish) bilan jinoyat ishi qo‘zg‘atilgan. Hozirda tergov harakatlari o‘tkazilmoqda.
Izoh (0)