BAA O‘zbekiston zargarlik sanoatiga investitsiya kiritishi kutilyapti
O‘zbekistonning Birlashgan Arab Amirliklaridagi elchixonasi ko‘magida “O‘zbekzargarsanoati” uyushmasi raisi Davron Samatov boshchiligidagi mamlakat delegatsiyasi Dubayda bo‘lib o‘tgan Global Gold Convention 2022 ko‘rgazmasida ishtirok etdi. Bu haqda “Dunyo” axborot agentligi xabar qildi.
Qayd etilishicha, tadbirda O‘zbekistonning investitsiya va eksport salohiyati hamda zargarlik sanoati taraqqiyoti yuzasidan taqdimot uyushtirilgan.
O‘zbekiston vakillari Osiyo, Yaqin Sharq va Afrika davlatlarida oltin sanoati rivojlanishi tendensiyasiga bag‘ishlangan muhokamalarda ishtirok etib, xorij tomoniga mamlakatda ushbu sohada olib borilayotgan islohotlar haqida batafsil ma’lumot bergan.
Bundan tashqari, “O‘zbekzargarsanoati” uyushmasi vakillari IBMC International, TVT consulting va Stuart and Hamlyn kompaniyalari bilan ikki tomonlama muzokaralar o‘tkazgan. Unda jahon oltin bozorining holati va hamkorlik istiqbollari yuzasidan fikr almashilgan.
O‘zbekiston delegatsiyasi safar davomida, shuningdek, Dubaydagi Siroya Jewellers kompaniyasi faoliyati bilan tanishgan. Kompaniya rahbari R.Jain bilan hamkorlik masalalari, jumladan, O‘zbekistonga investitsiya kiritish, zargarlik mahsulotlarini ishlab chiqishda soliqlar va bojxona tizimi imkoniyatlari muhokama qilingan.
Bo‘lib o‘tgan suhbat intihosida O‘zbekiston bozorini o‘rganish va investitsiya kiritish imkoniyatlarini tahlil qilish uchun 2023-yilda Siroya Jewellers kompaniyasi delegatsiyasining mamlakatga amaliy safarini uyushtirishga kelishib olingan.
