Xitoy anonim o‘yinchi, Turkiya yetakchi: O‘zbekiston oktabr oyida 8,7 tonna oltin sotib oldi
O‘zbekiston Markaziy banki oktabr oyida 8,7 tonna oltin sotib olgan. Bu haqda tahlilchilarga tayanib, Kitco xabar bermoqda.
O‘zbekiston yil boshidan beri 37 tonna oltin sotib olgan. Mamlakatning jami oltin zaxiralari 399 tonnaga yetgan.
Shuningdek, o‘tgan oyda Turkiya Markaziy banki ham 9 tonna oltin sotib olib, 2022-yilda xarid qilingan oltin miqodorini 103 tonnaga yetkazdi. Turkiyaning rasmiy zaxiralarida jami 498 tonna oltin bor.
2022-yilning uchinchi choragida jahon markaziy banklari 399,3 tonna oltin sotib olgan edi.
Uchinchi chorakdagi ko‘rsatkich o‘tgan chorakka nisbatan 115 foizga ko‘pdir. Bu markaziy banklar tomonidan 2000-yildan beri eng yirik choraklik qimmatbaho metal xaridi bo‘ldi.
Iyul—sentabr oylarida Turkiya 31 tonna oltin sotib olib bu borada yetakchi bo‘lgan bo‘lsa, O‘zbekiston 26 tonna oltin sotib olgan holda ikkinchi bo‘lgan.
Jahon oltin kengashi ma’lumotlariga ko‘ra, xabar qilingan xaridlar bilan bir qatorda, yashirin xaridlar haqida ham hisob-kitoblar mavjud. Bozor tahlilchilari Xitoyni anonim tarzda oltin sotib olayotganini ta’kidlamoqda.
Xitoy Rossiyadan katta miqdorda oltin sotib olgan bo‘lishi mumkin, — dedi bozor tahlilchisi va Jahon oltin kengashining yaponiyalik sobiq direktori Itsuo Toshima.
Toshimaning ta’kidlashicha, bu 2009-yildan 2015-yilgacha oltin xaridlari haqida xabar bermagan Xitoy Xalq banki uchun odatiy holdir. O‘shanda mamlakat oltin zaxiralarini 600 tonnaga oshirganini ochiqlagandi.
