O‘zbekistonda tabiiy gaz ishlab chiqarish hajmi kamaydi

Davlat statistika qo‘mitasi O‘zbekistonning 2022-yil yanvar—oktabr oylariga ko‘ra sanoat ishlab chiqarishi haqida ma’lumot berdi.

Ma’lumotlarga ko‘ra, yanvar—oktabr oylarida 44,2 mlrd kub metrdan oshiq tabiiy gaz, 1 mln tonna gaz kondensati ham ishlab chiqarilgan.

O‘tgan yilning shu davriga nisbatan ikkala sanoat sohasida ishlab chiqarish kamaygan — mos ravishda 452,7 mln kub metr va 16,5 ming tonnaga.

Shuningdek, yil boshidan beri O‘zbekistonda 4,3 mln tonna ko‘mir ishlab chiqarilgan. Birgina oktabr oyining o‘zida bu ko‘rsatkich 484,4 ming tonnani tashkil qilgan.

Sentyabr oyida esa bu ko‘rsatkich 476,7 ming tonnaga teng bo‘lgan va bu oshib bormoqda.

Oktabr oyida 68,3 ming tonna, 2022-yilning dastlabki 10 oyida 656,2 ming tonna neft ishlab chiqarilgan. O‘tgan yilning shu davriga nisbatan sohadagi ishlab chiqarish 10,5 ming tonnaga ko‘paygan.

Avvalroq Rossiya xoldingi O‘zbekistonda neft va gaz konlarini topgani haqida xabar berilgandi.