Iordaniya qiroli poytaxti Quddus bo‘lgan Falastin davlatini yaratishga chaqirdi

Iordaniya qiroli Abdulla II 13-noyabr kuni poytaxti Sharqiy Quddus bo‘lgan Falastin davlatini yaratishga chaqirdi. Bu haqda The Jordan Times xabar berdi.

Mazkur chaqiriq uning 19-parlamentning ikkinchi sessiyasi ochilishidagi nutqida yangradi. Qirol mojaroni faqatgina adolatli va keng qamrovli yechimga erishish yo‘li bilan hal qilish mumkinligini aytdi. Abdulla II bu Isroil ishg‘oliga barham berish va 1967-yil 4-iyundagi chegaralar ichida poytaxti Sharqiy Quddus bo‘lgan mustaqil Falastin davlatini barpo etish orqali hal bo‘lishi mumkinligini ta’kidladi.

“Iordaniya mintaqada va butun dunyoda ro‘y berayotgan jadal o‘zgarishlardan xabardor bo‘lib, mamlakatlar o‘rtasidagi muhim bo‘g‘in sifatida mintaqadagi asosiy rolini o‘ynashda davom etmoqda. Bu afzallikdan o‘zaro manfaatlarga xizmat qiluvchi va milliy manfaatlarimizni maksimal darajada oshiradigan keng arab va mintaqaviy sherikliklarni yo‘lga qo‘yish orqali foydalanish kerak”, — dedi Iordaniya qiroli.

Fevral oyida Isroil va Falastin jamoat arboblari ikki davlat konfederatsiyasi bo‘yicha yangi taklifni ishlab chiqqandi. Ular taklif Yaqin Sharqda tinchlikka erishishda yordam berishini aytgan. Reja 1967-yilgi Yaqin Sharq urushi paytida Isroil tomonidan bosib olingan G‘arbiy Sohil, G‘azo va Sharqiy Quddusning aksariyat qismida mustaqil Falastin davlati tuzishni nazarda tutadi. Isroil va Falastin alohida hukumatlarga ega bo‘ladi, lekin xavfsizlik, infratuzilma va ikkala aholiga ta’sir qiladigan boshqa masalalarda kelishadi.

Rejaga ko‘ra, bosib olingan G‘arbiy Sohilda 500 mingga yaqin yahudiy ko‘chmanchilar qoladi. Hududda yashaydiganlarga ko‘chish yoki Falastin davlatining doimiy rezidenti bo‘lish imkoniyati beriladi. Xuddi shuncha falastinlikka Isroilda doimiy yashash va Falastin fuqarolari sifatida ko‘chishga ruxsat beriladi. Ya’ni tomonlar bir-birining hududiga ko‘chib o‘tishi va doimiy yashash joyiga ega bo‘lishi mumkin.

Bu mazkur tashabbus, asosan, 2003-yilda taniqli isroilliklar va falastinliklar, jumladan, sobiq amaldorlar tomonidan tuzilgan Jeneva kelishuviga asoslangan. Deyarli 100 sahifalik konfederatsiya rejasi asosiy muammolarni hal qilish uchun batafsil yangi tavsiyalarni o‘z ichiga oladi. Lekin mazkur reja hali hamon amalga oshgani yo‘q.