Иордания қироли пойтахти Қуддус бўлган Фаластин давлатини яратишга чақирди

Иордания қироли Абдулла II 13 ноябрь куни пойтахти Шарқий Қуддус бўлган Фаластин давлатини яратишга чақирди. Бу ҳақда The Jordan Times хабар берди.

«Иордания минтақада ва бутун дунёда рўй бераётган жадал ўзгаришлардан хабардор бўлиб, мамлакатлар ўртасидаги муҳим бўғин сифатида минтақадаги асосий ролини ўйнашда давом этмоқда. Бу афзалликдан ўзаро манфаатларга хизмат қилувчи ва миллий манфаатларимизни максимал даражада оширадиган кенг араб ва минтақавий шерикликларни йўлга қўйиш орқали фойдаланиш керак», — деди Иордания қироли.

Февраль ойида Исроил ва Фаластин жамоат арбоблари икки давлат конфедерацияси бўйича янги таклифни ишлаб чиққанди. Улар таклиф Яқин Шарқда тинчликка эришишда ёрдам беришини айтган. Режа 1967 йилги Яқин Шарқ уруши пайтида Исроил томонидан босиб олинган Ғарбий Соҳил, Ғазо ва Шарқий Қуддуснинг аксарият қисмида мустақил Фаластин давлати тузишни назарда тутади. Исроил ва Фаластин алоҳида ҳукуматларга эга бўлади, лекин хавфсизлик, инфратузилма ва иккала аҳолига таъсир қиладиган бошқа масалаларда келишади.

Режага кўра, босиб олинган Ғарбий Соҳилда 500 мингга яқин яҳудий кўчманчилар қолади. Ҳудудда яшайдиганларга кўчиш ёки Фаластин давлатининг доимий резиденти бўлиш имконияти берилади. Худди шунча фаластинликка Исроилда доимий яшаш ва Фаластин фуқаролари сифатида кўчишга рухсат берилади. Яъни томонлар бир-бирининг ҳудудига кўчиб ўтиши ва доимий яшаш жойига эга бўлиши мумкин.

Бу мазкур ташаббус, асосан, 2003 йилда таниқли исроилликлар ва фаластинликлар, жумладан, собиқ амалдорлар томонидан тузилган Женева келишувига асосланган. Деярли 100 саҳифалик конфедерация режаси асосий муаммоларни ҳал қилиш учун батафсил янги тавсияларни ўз ичига олади. Лекин мазкур режа ҳали ҳамон амалга ошгани йўқ.