Qashqadaryo viloyatining G‘uzor va Koson tumanlarida alimentdan qarzdor otalar o‘z majburiyatini bajarib, biri bolalari uchun yashashga uy olib bergan bo‘lsa, yana biri xonadonidan joy berdi. Bu haqda “Daryo”ga MIBning viloyat boshqarmasi axborot xizmati rahbari Gulnoza Dilmurodova xabar berdi.
Fuqarolik ishlari bo‘yicha Qarshi tumanlararo sudining 2022-yil 4-apreldagi buyrug‘iga asosan G‘uzor tumanida yashovchi qarzdor J.E.dan sobiq xotini, undiruvchi Yu.R. foydasiga ikki nafar voyaga yetmagan farzandining moddiy ta’minoti uchun aliment undirilishi belgilangan. Biroq qarzdor alimentdan bo‘lgan qarzlarini to‘liq to‘lamay kelgan.
Joriy yilning 26-oktabr kuni o‘zaro kelishuvga asosan qarzdor farzandlarining moddiy ta’minoti uchun ular 18 yoshga to‘lguniga qadar to‘lashi lozim bo‘lgan mablag‘lari o‘rniga Qarshi shahrida joylashgan 2 xonali kvartirasini undiruvchi nomiga notarius orqali rasmiylashtirib, 10 million so‘m aliment qarzdorligini ham to‘lab berdi, — deydi Gulnoza Dilmurodova.Koson tumanida yashovchi ota esa Fuqarolik ishlari bo‘yicha Koson tumanlararo sudining 2022-yil 9-avgust kunidagi ijro varaqasiga asosan da’vogar X.G. va ikki nafar voyaga yetmagan farzandiga Koson tumani Boyg‘undi MFY, Boyg‘undi qishlog‘idagi uyidan joy bergan.
Mazkur ijro hujjati bo‘yicha, davlat ijrochisi tomonidan ijro ishi yuritishni qo‘zg‘atish to‘g‘risida qaror qabul qilinib, ijro hujjati ijrosini ta’minlash maqsadida taraflarga ixtiyoriy muddat berilib, ogohlantirilgan. Shuningdek, ijro hujjati yuzasidan davlat ijrochisi tomonidan qarzdor M.O. va uning yaqin qarindoshlari bilan suhbat o‘tkazilgan. Tushuntirish ishlari va olib borilgan ijro harakatlari natijasida da’vogar X.G. ikki nafar voyaga yetmagan farzani bilan birgalikda ko‘rsatilgan manzilda yashay boshladi, — deydi mas’ul.
Izoh (0)