330 nafar mahalliy, 241 nafar xorijiy jurnalist. Turkiy davlatlar tashkiloti Samarqand sammitini yoritish uchun mo‘ljallangan matbuot markazi o‘z ishini boshladi (foto)

10-11-noyabr kunlari Samarqand shahrida Turkiy davlatlar tashkiloti (TDT)ning birinchi sammiti o‘tkaziladi.

Bugun, 9-noyabrdan boshlab sammitni yorituvchi ommaviy axborot vositalari xodimlari uchun mo‘ljallangan matbuot markazi o‘z ishini boshladi.

Ushbu matbuot markazida 330 nafar mahalliy jurnalist, 50 nafardan oshiq ekspert, shuningdek, 241 nafar xorijiy jurnalistlar ishtirok etmoqda. Tashqi ishlar vazirligidan 50 nafarga yaqin jurnalistlar akkreditatsiyadan o‘tgan. O‘zi qatnashish istagini bildirgan jurnalistlar soni ham 50 nafardan ortiq.

Matbuot markazida 250 dan ortiq kompyuter, sifatli internet OAV xodimlari uchun taqdim qilingan.

Sammitda kimlar ishtirok etadi?

Ma’lumot uchun, joriy yilgi sammitda 5 ta a’zo mamlakat — O‘zbekiston, Turkiya, Ozarbayjon, Qozog‘iston, Qirg‘iziston hamda 2 ta kuzatuvchi — Turkmaniston va Vengriya mamlakatlari rahbariyati ishtirok etishi kutilmoqda.

Tadbir kun tartibidan Tashkilot doirasida siyosiy-iqtisodiy, transport, madaniyat va turizm kabi sohalarda hamkorlikni yanada jadallashtirish masalalari muhokamasi hamda xalqaro va mintaqaviy masalalar yuzasidan fikr almashish ko‘zda tutilgan.

Qanday hujjatlarga imzo chekiladi?

Samarqand sammitida 10 dan ortiq hujjat imzo uchun kiritilishi rejalashtirilmoqda. Tadbirning asosiy hujjati bu — a’zo mamlakatlarning eng muhim mintaqaviy va global muammolar bo‘yicha mujassamlashgan pozitsiyalari o‘z ifodasini topgan Turkiy davlatlar tashkiloti Samarqand sammiti Deklaratsiyasidir.

Sammit yakunida Tashkilotga raislik bir yil muddatga Turkiyadan O‘zbekistonga o‘tadi.