10-11 ноябрь кунлари Самарқанд шаҳрида Туркий давлатлар ташкилоти (ТДТ)нинг биринчи саммити ўтказилади.
Бугун, 9 ноябрдан бошлаб саммитни ёритувчи оммавий ахборот воситалари ходимлари учун мўлжалланган матбуот маркази ўз ишини бошлади.
Ушбу матбуот марказида 330 нафар маҳаллий журналист, 50 нафардан ошиқ эксперт, шунингдек, 241 нафар хорижий журналистлар иштирок этмоқда. Ташқи ишлар вазирлигидан 50 нафарга яқин журналистлар аккредитациядан ўтган. Ўзи қатнашиш истагини билдирган журналистлар сони ҳам 50 нафардан ортиқ.
Матбуот марказида 250 дан ортиқ компьютер, сифатли интернет ОАВ ходимлари учун тақдим қилинган.
Саммитда кимлар иштирок этади?
Маълумот учун, жорий йилги саммитда 5 та аъзо мамлакат — Ўзбекистон, Туркия, Озарбайжон, Қозоғистон, Қирғизистон ҳамда 2 та кузатувчи — Туркманистон ва Венгрия мамлакатлари раҳбарияти иштирок этиши кутилмоқда.
Тадбир кун тартибидан Ташкилот доирасида сиёсий-иқтисодий, транспорт, маданият ва туризм каби соҳаларда ҳамкорликни янада жадаллаштириш масалалари муҳокамаси ҳамда халқаро ва минтақавий масалалар юзасидан фикр алмашиш кўзда тутилган.
Қандай ҳужжатларга имзо чекилади?
Самарқанд саммитида 10 дан ортиқ ҳужжат имзо учун киритилиши режалаштирилмоқда. Тадбирнинг асосий ҳужжати бу — аъзо мамлакатларнинг энг муҳим минтақавий ва глобал муаммолар бўйича мужассамлашган позициялари ўз ифодасини топган Туркий давлатлар ташкилоти Самарқанд саммити Декларациясидир.
Саммит якунида Ташкилотга раислик бир йил муддатга Туркиядан Ўзбекистонга ўтади.
Изоҳ (0)