2022-yilda eng ko‘p daromad olgan marhum mashhurlar reytingi e’lon qilindi

Forbes 2022-yilning eng ko‘p daromad olgan marhum mashhurlari reytingini tuzdi. Unda “Uzuklar hukmdori” muallifi, britaniyalik yozuvchi Jon Tolkiyen birinchi o‘rinni egalladi.

Ro‘yxat 2021-yil noyabridan 2022-yil oktabrigacha bo‘lgan davrda merosi eng ko‘p daromad keltirgan 13 nafar marhum dunyo yulduzlaridan iborat. Gap sotuvlar, striming platformalarida musiqalar tinglanishi, litsenziya bitimlari tuzilishidan tushgan daromad haqida bormoqda.

1973-yilda vafot etgan Jon Tolkiyen o‘tgan bir yil ichida 500 million dollar “ishlab topgan”.

Ikkinchi o‘rinda 2020-yilda avtohalokat oqibatida olamdan o‘tgan amerikalik basketbolchi Kobi Brayant joylashdi. Bir yilda u 400 million dollar daromad olgan.

Uchinchi o‘rinni britaniyalik musiqachi va aktyor Devid Boui egalladi, uning boyligi bir yilda 250 million dollarga ko‘paygan.

Eng boy marhum mashhurlar beshligiga musiqachilar Elvis Presli va Jeyms Braun yakun yasadi, ular tegishli ravishda 110 va 100 million dollarga boyigan.

Shuningdek, reytingga xonanda Maykl Jekson (75 million dollar, 6-o‘rin), yozuvchi Doktor Syuz (32 million dollar, 8-o‘rin), musiqachi Jon Lennon (16 million dollar, 12-o‘rin) va boshqalar kiritildi.