Yevropa uchun imkoniyat: Qozog‘iston 50 milliard dollarlik zavodda yashil vodorod ishlab chiqarmoqchi
Qozog‘iston Yevropaning qazib olinadigan yoqilg‘iga bo‘lgan qaramligini kamaytirishga yordam berish uchun o‘n yil oxirigacha 50 milliard dollarlik loyiha orqali yashil vodorod ishlab chiqarishni rejalashtirmoqda. Bu haqda Bloomberg xabar bermoqda.
Shvetsiyadagi Yevropaning eng yirik shamol elektr stansiyasini boshqaruvchi Svevind Energy Group kompaniyasi Qozog‘iston hukumati bilan dunyodagi eng yiriklaridan biri bo‘lishi kutilayotgan 20 gigavattlik yashil vodorod zavodini qurish bo‘yicha shartnoma imzoladi.
Elektrolizatorlar 2032-yildan boshlab yiliga 2 million tonnagacha yashil vodorod ishlab chiqarish imkoniyatiga ega bo‘ladi. Bu 2030-yilda Yevropa Ittifoqi tomonidan import qilinadigan yashil vodorodning beshdan bir qismiga teng.
Bugun imzolangan investitsiya shartnomasi loyihani keyingi, hal qiluvchi bosqichga olib boradi. “Qozog‘iston loyiha uchun ideal mezbon mamlakat hisoblanadi, chunki u yil davomida ajoyib shamol sharoitlari va quyosh radiatsiyasiga ega, — deydi Svevind Energy Group asoschisi va bosh direktori Volfgang Kropp.
Uning ta’kidlashicha, mamlakat yashil vodorod ishlab chiqarishning arzonroq narxiga ega, bu esa uni jahon bozorida juda raqobatbardosh qiladi.
Elektrolizatorlar sanoat parki Qozog‘iston janubi-g‘arbiy qismidagi tekis yaylovlarda umumiy quvvati taxminan 40 gigavatt bo‘lgan shamol va fotoelektr stansiyalari bilan ta’minlanadi.
Yashil vodorod qayta tiklanadigan elektr energiyasidan foydalangan holda karbonat angidrid chiqindilarisiz ishlab chiqariladi.
Loyiha Yevropa Ittifoqining qazib olinadigan yoqilg‘iga bog‘liqligini kamaytirish va energiya ko‘p talab qiladigan sanoatni karbonsizlantirish rejasining asosiy elementidir.
