Buxorodagi bir qator ko‘chalarda maksimal tezlik 60 km etib belgilanadi
20-oktabr kuni Xalq deputatlari Buxoro viloyati kengashining 66-sessiyasi bo‘lib o‘tdi. Sessiya ishida “Viloyatda yo‘l harakati xavfsizligini borasida amalga oshirilayotgan ishlarning samaradorligi to‘g‘risida”gi masala muhokama qilinib, kun tartibidagi masala yuzasidan viloyat IIB YHXB boshlig‘i Anvar Ahmedov axborot berdi.
Bunda O‘zbekiston prezidentining 2022-yil 4-apreldagi “Avtomobil yo‘llarida inson xavfsizligini ishonchli ta’minlash va o‘lim holatlarini keskin kamaytirish chora-tadbirlari to‘g‘risida”gi qarorida belgilangan vazifalar ijrosini ta’minlash maqsadida viloyatda yo‘l harakati xavfsizligini ta’minlash borasida muayyan ishlar amalga oshirilayotgani qayd etilgan.
Amalga oshirilgan tadbirlar natijasida joriy yilning 9 oyi yakuni bo‘yicha sodir etilgan yo‘l-transport hodisalari yuzasidan qo‘zg‘atilgan jinoyat ishlari soni o‘tgan yilning shu davriga nisbatan 30 taga yoki 10,6 foizga kamaygani ta’kidlangan. Olib borilgan ijobiy ishlarga qaramasdan yo‘l-transport hodisalari Jondor (3 taga), Peshku (1 taga), Qorovulbozor (1 taga) tumanlari hamda Buxoro shahrida (4 taga) ko‘paygan. Yo‘l-transport hodisalarining 52 tasi tezlikni oshirish oqibatida sodir etilgan. Buxoro shahrida umumiy 68 ta yo‘l-transport hodisalari sodir etilgan bo‘lib, hodisalarning 9 tasi o‘lim bilan yakunlangan.
Sessiyada sodir etilgan yo‘l-transport hodisalari tahlillaridan kelib chiqib, harakat xavfsizligini ta’minlash, yo‘l-transport hodisalarining oldini olish maqsadida yo‘l harakati xavfsizligini ta’minlash bo‘yicha viloyat maxsus komissiyasining Buxoro shahridagi I.Karimov, M.Iqbol, Namozgoh, Ibn Sino, B.Naqshband hamda Navoiy shohko‘chalarida transport vositalari harakatlanishining yuqori tezligini soatiga 60 kilometr etib belgilash yuzasidan taklifi ko‘rib chiqilgan.
Bu borada deputatlarning fikr-mulohazalari eshitilgan va ma’qullangan. Ushbu taklifni tasdiqlash uchun yo‘l harakati xavfsizligini ta’minlash bo‘yicha Respublika maxsus komissiyasiga taqdim etish belgilangan.
