Қозоғистон президенти Қосим-Жўмарт Тўқаевнинг фикрича, у сайловда «қандайдир муайян ташкилот» эмас, балки «жамоатчилик-сиёсий кучлар кенг коалицияси» номидан қатнашса, тўғри бўлади. Бу ҳақда у Павлодар вилоятига ишчи сафари чоғида маълум қилди, деб ёзади Asia Plus.
«Кўриб турибман, бўлғуси сайловларда қайси бирлашмадан номзодимни қўйишим жамоатчиликда алоҳида қизиқиш уйғотмоқда. Очиқ-ойдин айтаман — менга турли республика бирлашмаларидан ва партиялардан уларнинг номзоди бўлиш ҳақида таклифлар келиб тушмоқда», — деди Тўқаев.
Унинг айтишича, «буларнинг барчаси фуқароларнинг амалга оширилаётган ва белгиланган ўзгаришларни қўллаб-қувватлаш даражаси уч ярим йил ичида анча ўсганидан дарак беради».
«Ўйлайманки, сайловга қандайдир муайян ташкилотдан эмас, балки мамлакатда олиб борилаётган ислоҳотларнинг ижтимоий базасини шакллантирувчи жамоатчилик-сиёсий кучлар кенг коалициясидан қатнашсам тўғри бўлади. Шунингдек, бу давлат раҳбарининг турли партия ва бирлашмалардан тенг узоқликда бўлиш тамойилини яна бир бор тасдиқлаш имконини беради», — деди Тўқаев.
У давлат раҳбари сифатида «президент сайлови ҳалол, очиқ ва адолатли ўтишини кафолатлаш»га ваъда берди. Шунингдек, Тўқаевнинг фикрича, президент сайлови арафасидаги сайлов кампанияси «суръатлари ошмоқда». «Ички сиёсат майдонидаги жонланиш кўзга яққол ташланмоқда», — деди у.
Айни пайтга қадар президент лавозимига тўрт киши даъвогар бўлгани маълум. Булар «Ауил» партиясидан Жигули Дайрабаев, ОСДП партиясидан Нурлан Ауесбаев, «Аманат» касаба уюшмалари ҳамдўстлигидан Мейрам Кажикен. Шунингдек, Польша фуқароси Балли Мажец бир неча марта ҳужжатларини топширишга уринган.
Тўқаевнинг «жамоатчилик-сиёсий кучлар кенг коалицияси»дан номзодини қўйиш нияти ҳақидаги баёноти бир қатор республика ташкилотлари уни президентликка номзодлар қаторида кўришни исташини айтганидан кейин янгради. Хусусан, Миллий кўнгиллилар тармоғи, Қозоғистон фуқаролик альянси, Qazaqstan Team ёшлар бирлашмаси, Фахрийлар ташкилоти ва Қозоғистон спортчилар иттифоқи шундай ташаббус билан чиққан.
Эслатиб ўтамиз, Қозоғистонда 20 ноябрь куни навбатдан ташқари президентлик сайлови ўтказилади. Қозоғистон президенти Қосим-Жўмарт Тўқаев шу йил кузда навбатдан ташқари президент сайловларини ўтказиш таклифини 1 сентябрь куни халққа йўллаган мурожаатида билдирганди. Президентлик мандатини етти йиллик битта муддат билан чеклашни ва қайта сайланишни тақиқлашни ҳам ўша мурожаатида таклиф қилганди.
Изоҳ (0)