Osiyo Taraqqiyot Banki (OTB) O‘zbekistonda oziq-ovqat xavfsizligini ta’minlash, aholining ijtimoiy himoyaga muhtoj qatlamini himoya qilish va bandlikni qo‘llab-quvvatlash uchun 500 million dollar miqdorida kredit ajratishni ma’qulladi. Bu haqda bank matbuot xizmati xabar bermoqda.
Hukumat dasturi oziq-ovqat xavfsizligini mustahkamlash va narxlar barqarorligini ta’minlash, kam ta’minlangan oilalar, keksalar va aholining ijtimoiy himoyaga muhtoj boshqa qatlamlariga to‘g‘ridan to‘g‘ri ijtimoiy yordam ko‘rsatish, shuningdek, ishsiz va qaytib kelgan mehnat migrantlarini qo‘llab-quvvatlashga qaratilgan.
Markaziy Osiyo pandemiyadan xalos bo‘lgach, mintaqa urushning iqtisodiy ta’siriga duch keldi, bu esa ayniqsa kambag‘al odamlarning hayotini og‘irlashtirdi, — dedi OTBning Markaziy va G‘arbiy Osiyo bo‘yicha departamenti bosh direktori Yevgeniy Jukov.
Ta’kidlanishicha, dastur O‘zbekiston hukumatining strategik ustuvor yo‘nalishlariga mos keladi va ijtimoiy himoyani rag‘batlantirish bilan birga iqtisodiy barqarorlikni oshirishga yordam beradi.
COVID-19 pandemiyasi va Rossiyaning Ukrainaga bostirib kirishi oqibatida yuzaga kelgan iqtisodiy zarba O‘zbekistonga jiddiy zarar yetkazdi.
Ushbu ta’sirlar savdo xarajatlari, inflyatsiya, ishsizlikning oshishi va pul o‘tkazmalarining qisqarishini o‘z ichiga oladi.
Bu esa, o‘z navbatida, kam ta’minlangan uy xo‘jaliklarining xarid qobiliyatini pasaytiradi, shaxsiy iste’molni zaiflashtiradi, qashshoqlikning kuchayishiga olib keladi.
Shuningdek, OTB monitoring va baholashni qo‘llab-quvvatlash uchun texnik yordam ko‘rsatadi, bu texnik yordam uchun maxsus jamg‘armaning 400 ming dollar miqdoridagi granti hisobidan moliyalashtiriladi.
Avvalroq Osiyo taraqqiyot banki va O‘zbekiston 2,8 milliard dollarlik 27 ta loyihani birgalikda amalga oshirish to‘g‘risida kelishuvga erishgani haqida xabar berilgan edi.
Izoh (0)