Farg‘onada yo‘l qoidasini buzgan YPX xodimi 540 ming so‘m jarima to‘laydigan bo‘ldi

Farg‘onada xizmat vaqtida shaxsiy avtomashinasida qoida buzgan YPX xodimiga chora ko‘rildi. Bu haqda “Daryo”ga viloyat IBB YHXB axborot xizmati xabar berdi.

Ma’lum qilinishicha, ijtimoiy tarmoqlarda YPX xodimiga tegishli Matiz yo‘l harakati qoidalarini buzgani aks etgan fotosurat tarqalgan.

Ushbu holat o‘rganilganda, viloyat IIB jamoat xavfsizligi xizmati Yo‘l harakati xavfsizligi boshqarmasi xodimi Oltiariq tumani hududidan o‘tgan 4R-112 Farg‘ona halqa avtomobil yo‘lida maxsus ko‘chma radar qurilmasi bilan xizmat olib borayotgan vaqtida o‘zining shaxsiy transport vositasida yo‘l harakati qoidalarini buzib, piyodalar yo‘lkasida harakatlangani aniqlangan.

2022-yilning 5-oktabr kuni YPX inspektoriga nisbatan to‘xtash qoidalarini buzgani bo‘yicha Ma’muriy javobgarlik to‘g‘risidagi kodeksning 128-6-modda (transport vositalari haydovchilarining to‘xtash yoki to‘xtab turish qoidalarini buzishi)si 1-qismi tartibida bayonnoma rasmiylashtirilib, u 540 ming so‘m miqdorida jarimaga tortilgan.