“Daryo” kundaligida 4-oktabrda sodir bo‘lgan eng muhim voqealar
“Daryo” nashri 4-oktabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Shavkat Mirziyoyev Vengriya prezidenti bilan xalqaro ahamiyatga ega mavzular yuzasidan fikr almashdi
Vengriya poytaxti Budapesht shahridagi Shandor saroyida 4-oktabr kuni Shavkat Mirziyoyevning Vengriya prezidenti Katalin Novak bilan uchrashuvi bo‘lib o‘tdi. Bu haqda Prezident matbuot xizmati xabar qildi.
Prezidentlar O‘zbekiston va Vengriya o‘rtasidagi ko‘p qirrali strategik sheriklik munosabatlarini kengaytirish masalalari yuzasidan fikr almashgan.
Shuningdek, keyingi yillarda tovar ayirboshlash hajmi qariyb uch barobar oshgani ta’kidlangan.
Tomonlar O‘zbekiston Yevropa Ittifoqining GSP+ preferensiyalar tizimiga qo‘shilgani o‘zaro savdoni salmoqli darajada ko‘paytirish va diversifikatsiya qilish uchun yangi imkoniyatlar ochishini ta’kidlagan.
Ma’lumot o‘rnida, GSP+ tushunchasi— savdo vositasidan ham kengroq tushuncha bo‘lib, tizimga a’zo davlatlar inson huquqlari, atrof-muhit muhofazasi va boshqalar bo‘yicha 27 ta asosiy xalqaro konvensiyani bajarishlari kerak.
Ayni paytda Vengriya hukumati “Xungarikum” dasturi doirasida o‘zbekistonlik talaba va doktorantlar uchun har yili ajratiladigan kvotani 170 tagacha oshirish to‘g‘risida qaror qabul qilgan. O‘zbekiston va Vengriya oliy ta’lim muassasalari rektorlarining ikkinchi forumini o‘tkazish maqsadga muvofiqligi ko‘rsatib o‘tilgan.
KXDR Yaponiyaga qarata raketa uchirdi, u tarixdagi eng uzoq parvozni amalga oshirdi
KXDR 4-oktabr kuni ertalab Yaponiyaga qarata ballistik raketa uchirdi, u Xokkaydo prefekturasi ustidan uchib o‘tib, Tinch okeaniga quladi. Bu haqda NHK xabar bermoqda. Shundan keyin Yaponiya hukumati havo trevogasini e’lon qilib, osmondan raketa bo‘laklari tushishi ehtimoli haqida ogohlantirdi. So‘nggi marta KXDR raketasi Yaponiya hududidan uchib o‘tishi 5 yil avval sodir bo‘lgandi.KXDR tomonidan uchirilgan raketa kuzatuvlar tarixida birinchi marta 4600 km masofani bosib o‘tgan. Bu haqda Yaponiya mudofaa vaziri Yasukadzu Xamada brifing chog‘ida ma’lum qildi.
Hozirda Shimoliy Koreya ham jahondagi vaziyatga nisbatan o‘z pozitsiyasini bildirib, Donbass, Xerson va Zaporojye viloyatlarining Rossiyaga qo‘shilishini qo‘llab-quvvatladi.
AQSH hijob bilan bog‘liq namoyishlar tufayli Eronga sanksiyalar kiritadi
Eronda davom etayotgan norozilik namoyishlari fonida AQSH shu hafta ushbu mamlakatga qarshi yangi sanksiyalar kiritadi. Bu haqda prezident Jo Baydenning Oq uy saytida e’lon qilingan bayonotida aytiladi.“Shu hafta AQSH tinch namoyishchilarga nisbatan zo‘ravonlikda aybdor bo‘lgan shaxslarga qarshi qo‘shimcha sanksiyalar kiritadi. Biz Eron mansabdorlarini javobgarlikka tortishda va eronliklarning erkin namoyishlar huquqini qo‘llab-quvvatlashda davom etamiz”, — dedi Bayden.Shuningdek, uning ta’kidlashicha, Vashington Eron aholisi uchun internetdan foydalanish imkoniyatini yengillashtiradi, “xususan, xavfsiz tashqi platforma va xizmatlardan foydalanish imkoniyatini kengaytirish orqali”.Avvalroq tinch norozilik namoyishlarini bostirish uchun Eron hukumati ko‘pchilik fuqarolar uchun internetni o‘chirib qo‘ygan.
Eron oliy rahnamosi mamlakatdagi ommaviy namoyishlarda AQSH va Isroilni aybladi
Eron oliy rahbari Oyatulloh Ali Xomanaiy mamlakatda ikki haftadan ortiq vaqtdan beri davom etayotgan keng ko‘lamli norozilik namoyishlariga ilk bor izoh berdi.U mazkur namoyishlarni uyushtirishda AQSH va Isroilni aybladi hamda hijoblarni yirtib, masjidlar va politsiya mashinalariga o‘t qo‘yganlarning xatti-harakatlarini “g‘ayritabiiy” deb atadi.“Buni kim rejalashtirgan? Shubhasiz, Amerika — yolg‘onchi, zo‘ravon, sionistik rejim va uning malaylari xorijdagi bir qancha xoin eronliklarning yordami bilan (uyushtirgan)”, — dedi Oyatulloh Ali Xomanaiy.
Ayni paytda Yevropa Ittifoqi va Isroil o‘rtasida 2012-yildan buyon birinchi marta oliy darajadagi muzokaralar o‘tkazilmoqda.
Associated Press: Urush boshidan beri Rossiya yarim mlrd dollarlik Ukraina donini o‘margan. O‘g‘irlikni yashirish uchun don ochiq dengizda kemadan kemaga o‘tkazilgan
Urush boshlanganidan keyin Rossiya Ukrainaning kamida 530 million dollarlik donini o‘g‘irlagan. Sun’iy yo‘ldoshdan olingan suratlar, hujjatlar, transponder ma’lumotlari va ijtimoiy tarmoqlardagi xabarlarni o‘rgangan surishtiruvdan so‘ng Associated Press jurnalistlari shunday xulosaga keldi.
Jurnalistlar Ukrainaning Rossiya tomonidan bosib olingan viloyatlaridan don ortilgan 30 ga yaqin kemaning Turkiya, Suriya, Livan va boshqa mamlakatlar portlariga amalga oshirgan 50 dan ortiq reyslari iziga tushdi.Surishtiruv mualliflari, shuningdek, o‘g‘irlangan donni qabul qiluvchilar Turkiya rasmiylari ham bo‘lishi mumkinligini ta’kidlamoqda.
Ukraina — dunyodagi eng yirik don eksportchilaridan biri. 2021-yilda mamlakat 12,4 milliard dollarlik g‘alla sotgan. Urush boshlanganidan keyin mahsulotlarni dengiz orqali eksport qilish to‘xtatildi.
