Toshkentning ikki tumanidagi ayrim hududlar gazsiz qoldi (ro‘yxat)

Toshkent shahri Mirzo Ulug‘bek va Shayxontohur tumanlarining ba’zi joylarida gaz sizib chiqish holati sababli gaz ta’minoti vaqtinchalik to‘xtatildi. Bu haqda “Hududgaz Poytaxt” xabar berdi.

Qayd etilishicha, Mirzo Ulug‘bek tumani Mahatma Gandi ko‘chasida elektr tarmoqlari korxonasi ish olib borayotgan vaqtda o‘rta bosimli gaz quvuriga shikast yetgan. Oqibatda kuchli gaz sizib chiqish holati yuzaga keldi. Shu sababli 4-oktabr kuni soat 21:05 da Darxon massivida 25 ta ko‘p qavatli uylardagi 1500 ta xonadonda, M.Gandi ko‘chasidagi 80 ta hovli xonadonda, Asaka ko‘chasidagi 60 ta hovli xonadonda hamda 16 ta ulgurji tashkilotda gaz ta’minoti 5-oktabr kuni soat 09:00 ga qadar vaqtinchalik to‘xtatildi.

Shunday holat Shayxontohur tumanida ham ro‘y berdi. Uch lola ko‘chasida yo‘l qurilish xodimlari ishlayotgan vaqtda gaz quvurida avariya sodir bo‘lgani tufayli 4-oktabr kuni soat 20:00 da Nurafshon shohko‘chasi hamda Mujurmon Obid ko‘chalari kesishmasida joylashgan Makro supermarketida gaz ta’minoti vaqtinchalik to‘xtatildi. Shuningdek, Olimxo‘jayev, “Samarqand darvoza” mahallalarida gaz bosimi pasaygan. Hozirda ta’mirlash ishlari olib borilmoqda. Avariya bartaraf etilgachm gaz ta’minoti qayta tiklanadi.

“Hududgaz Poytaxt” gaz ta’minoti filiali ta’mirlash ishlari tufayli yetkazilayotgan noqulayliklar uchun tabiiy gaz iste’molchilardan uzr so‘radi.