Janubiy Koreya prezidenti AQSH Kongressini “ahmoqlar” deb atadi, bu tasodifan mikrofon orqali yangrab ketdi

Janubiy Koreya telekanallaridan biri mamlakat prezidenti Yun Sok Yolning AQSH kongressiga qaratilgan haqoratli iborasi eshitilib qolgan videoni e’lon qildi, deb yozadi The Washington Post.

Bu paytda siyosatchi BMT Bosh assambleyasida qatnashish uchun Nyu-Yorkka kelgan edi. Uning aynan shu gapi jamoatchilikka qaratilmagan, balki tasodifan mikrofon orqali yangrab ketgan edi.

Undan sal avvalroq Janubiy Koreya prezidenti AQSH prezidenti Jo Bayden bilan Nyu-Yorkda Zaxiralarni to‘ldirish bo‘yicha global fond anjumanida uchrashgandi. Bayden butun dunyoda OITS, tuberkulyoz va malyariyaga qarshi kurashuvchi jamoatchilik sog‘lig‘ini saqlash kampaniyasiga AQSH nomidan 6 milliard dollar ajratishga va’da berdi. Biroq ushbu moliyaviy ko‘mak Kongress tomonidan tasdiqlanishi kerak.

“Agar bu ahmoqlar uni Kongressda tasdiqlamasa, Baydenni yerga urgan bo‘ladi” — Yun Sok Yolning o‘z yordamchilar guruhiga qarata aytilgan ushbu gapi ular tadbirni tark etish chog‘ida mikrofon orqali eshitilib qolgan.

Biroq Janubiy Koreya prezidenti ofisi Yunning bu gapi AQSH haqida bo‘lganini rad etdi. Prezident matbuot kotibi aytishicha, Yun Baydenning ismini tilga olmagan va umuman butun gap ham noto‘g‘ri tarjima qilingan.

AQSH prezidentining milliy xavfsizlik bo‘yicha maslahatchisi vakili tasodifan mikrofon orqali eshitilib qolgan gaplarni izohlamasligini aytdi.

“Bizning Koreya Respublikasi bilan aloqalarimiz mustahkam va rivojlanmoqda, — deyiladi bayonotda. — Prezident Bayden prezident Yunni o‘zining asosiy ittifoqchisi deb biladi. Ikki yetakchi BMT Bosh Assambleyasi doirasuda yaxshi va sermahsul uchrashuv o‘tkazdi”.

Yun Sok Yol may oyida Janubiy Koreya prezidenti lavozimiga kirishgan. Bunga qadar u hech qachon saylab qo‘yiladigan lavozimni egallamagan va tashqi siyosatda ham tajribaga ega emas.