Amerikaliklar 2022-yilning fevral oyidan beri Ukraina Qurolli kuchlarining 1475 nafar askarini AQSH tomonidan Ukrainaga yetkazib berilgan qurollardan foydalanishga o‘rgatdi.
Xususan, 630 nafar ukrainalik askar M777 gaubitsalaridan, 325 nafari esa HIMARS baravar o‘t ochuvchi reaktiv tizimlaridan, 300 nafar harbiy M109 gaubitsalaridan foydalanishni o‘rgangan. Yana 120 kishi M113 piyodalarning jangovar mashinalaridan, 100 nafari esa Amerika dronlaridan foydalanish bo‘yicha saboq olgan.
Avvalroq Pentagon AQSH fevral oyi oxiridan beri Ukrainaga 140 ta artilleriya tizimi hamda ular uchun 660 ming snaryad va raketalar yetkazib bergani haqida xabar qilgandi.
Shuningdek, AQSHdan zirhli nishonlarga qarshi kurashish uchun 41 000 ta ko‘chma raketa komplekslari, 1400 ta ko‘chma zenit-raketa tizimlari, 15 ta vertolyot, 38 ta radar, 10,2 mingta avtomat va to‘pponcha, o‘qotar qurollar uchun 63,8 millionga yaqin patron hamda 18 ta patrul qayiqlari jo‘natilgan.
Mazkur harbiy yuklarni yetkazib berish maqsadida og‘ir transport samolyotlari (ham harbiy, ham Pentagon tomonidan ijaraga olingan) Yevropaga 754 ta parvozni amalga oshirgan. Shuningdek, jarayonda 28 ta kema, 67 ta poyezd va 1,5 mingta tirkama ishtirok etgan.
Jami hisobda Ukrainaga o‘tkazish uchun Yevropaga 47 ming tonnadan ortiq qurol va harbiy texnika yetkazib berilgan.
AQSH Mudofaa vazirligi ma’lumotlariga ko‘ra, qurollarning katta qismi Ukraina bilan chegaradan 90 kilometr uzoqlikda joylashgan Polshaning Jeshuv shahri aerodromiga yetkazilgan.
Izoh (0)