Toshkentda uy xizmatchisi o‘zi ishlayotgan xonadondan 170 ming dollar o‘g‘irladi

Toshkentning Mirzo Ulug‘bek tumanida uy xizmatchisi bo‘lgan ayol o‘zi ishlayotgan xonadondan 170 ming dollarni o‘g‘irladi. Bu haqda “Mening Yurtim” telekanalining “Markaziy studiya” dasturida xabar qilindi.

Ma’lum qilinishicha, ayol o‘g‘rilik sodir etgan xonadonda 10 yildan buyon uy xizmatchisi bo‘lib ishlab kelgan. U xonadonning barcha xonalariga kirish huquqiga ega bo‘lib, eshik kodlarini oldindan yaxshi bilgan.

Yillar davomida ishonchga kirganidan foydalangan uy ishchisi xonadondagi moddiy boyliklarni qo‘lga kiritish maqsadida o‘zining tanishlari bilan jinoiy reja tuzgan va uy egasi xorijga xizmat safari bilan ketganda buni amalga oshirgan. Ular uyning yerto‘lasidagi shkaf ichida bo‘lgan seyfdan 170 ming dollar pullarni o‘g‘irlab, qochib qolgan. Qo‘lga kiritilgan pullarni o‘z ehtiyojlari uchun sarflab yuborgan.

Jinoyat ishlari bo‘yicha Mirzo Ulug‘bek tuman sudi tomonidan unga nisbatan 10 yilga ozodlikdan mahrum qilish jazosi tayinlangan.