O‘zbekiston tashqi ishlar vaziri vazifasini bajaruvchi Vladimir Norov boshchiligidagi delegatsiya Bryusselga tashrif doirasida 6-sentabr kuni Belgiya tashqi ishlar, Yevropa ishlari, tashqi savdo va federal madaniyat muassasalari vaziri Haja Lahbib bilan uchrashuv o‘tkazdi. Bu haqda TIV axborot xizmati xabar qildi.
Qayd etilishicha, muzokaralarda O‘zbekiston va Belgiya o‘rtasidagi munosabatlarning bugungi holati va rivojlanish istiqbollari muhokama qilingan. Siyosiy, savdo-iqtisodiy va madaniy-gumanitar sohalardagi aloqalar o‘sib borayotgani qayd etilgan.
Ikki tomonlama muloqotni jadallashtirish, jumladan, turli darajadagi tashriflarni tashkil etish, tashqi ishlar vazirliklari o‘rtasida maslahatlashuvlarni o‘tkazish, xalqaro tuzilmalar doirasida bir-birini qo‘llab-quvvatlashning muhimligi ko‘rsatib o‘tilgan.
O‘zbekiston va Belgiya barcha yo‘nalishlarda aloqalarni jadallashtirishga tayyorligi bildirilgan. Joriy yil oxirida Toshkentda ikki davlat tashqi ishlar vazirliklari o‘rtasida siyosiy maslahatlashuvlarning navbatdagi davrasini o‘tkazish masalasini ishlab chiqish yuzasidan kelishib olingan.
Belgiya tashqi ishlar vazirligi rahbariga O‘zbekiston Konstitutsiyasiga kiritilayotgan o‘zgarishlarning mazmun-mohiyati to‘g‘risida axborot taqdim etilgan. Konstitutsiyaviy islohotlar jamoatchilik fikri va takliflarini, aholining barcha qatlamlari manfaatlarini, shuningdek, xorijiy ekspertlarning baholarini hisobga olgan holda ochiq, shaffof va erkin jamoatchilik muhokamasi sharoitida amalga oshirilayotgani ta’kidlangan.
Izoh (0)