Samarqandda MIB xodimi bir dona hujjatni ijro qilish uchun kuniga 120 km yo‘l bosishga majbur bo‘lmoqda

Samarqandda Majburiy ijro byurosi xodimi bitta hujjat ijrosi uchun kuniga 120 kilometr yo‘l bosishga majbur bo‘lmoqda. Bu haqda Xalq deputatlari viloyat Kengashining yetmish birinchi sessiyasida ma’lum qilindi, — deya “Daryo” muxbiri xabar berdi.

Boshqarma boshlig‘i Mehroj Nasrullayevning ma’lum qilishicha, bu xodimlarning ish faoliyati sifatiga, samarasiga, ijro muddatlarining rioya qilinishiga salbiy ta’sir ko‘rsatmoqda.

“Misol uchun, Samarqand viloyatining Qo‘shrabot tumani markazidan tumanning ‘Jonbuloq’ mahallasigacha bo‘lgan masofa 110 kilometrni, ‘Toz’ va ‘Sorig‘ul’ mahallalarigacha 75-80 kilometrni, ‘Ravot’ va ‘Urganji’ mahallalarigacha 50-55 kilometrni tashkil qiladi. Yoki Nurobod tumani markazidan ‘Lolazor’ mahallasigacha bo‘lgan masofa 120 kilometrni, ‘Sahoba’ mahallasigacha 95 kilometrni, ‘Qo‘rg‘oncha’ mahallasigacha 80 kilometrni tashkil qiladi. Ushbu hududlar tog‘li hududlar bo‘lganligi sababli ichki toshloq va yetib borish qiyin bo‘lgan yo‘llar orqali boriladi. Byuroning Qo‘shrabot va Nurobod tuman bo‘limlarida uch nafardan davlat ijrochisi faoliyat ko‘rsatadi. Agar bir nafar davlat ijrochisining shaxsiy avtomashinasi bo‘lgan taqdirda ham ushbu hududga borib bitta ijro hujjati bo‘yicha ijro harakatini amalga oshirish uchun bir kun vaqti ketadi”, — deydi Mehroj Nasrullayev

Ta’kidlanishicha, ayni paytda MIBning viloyat boshqarmasida jami 200 nafar davlat ijrochisi faoliyat olib bormoqda. Bir davlat ijrochisining ish yurituvida o‘rtacha 1638 tadan ijro hujjati mavjud.

Qo‘shimcha qilinishicha, 2022-yilning o‘tgan 6 oyida tamomlangan, ya’ni yakuniy qaror qabul qilingan 121 ming 720 ta ijro hujjati davlat ijrochilariga taqsimlanganda, bir oyda har bir davlat ijrochisiga o‘rtacha 101 tadan ish to‘g‘ri kelgan.