Yevropa tiklanish va taraqqiyot banki O‘zbekistonda ekologik loyihani amalga oshirishga ko‘maklashadi
O‘zbekiston Ekologiya va atrof-muhitni muhofaza qilish davlat qo‘mitasi raisi Narzullo Oblomurodov va Yevropa tiklanish va taraqqiyot bankining Yadro xavfsizligi departamenti direktori Baltazar Lindauer o‘rtasida mamlakatning Chorkesar va Yangiobod maxsus poligonlarini rekultivatsiya qilish borasidagi sa’y-harakatlarini qo‘llab-quvvatlash bo‘yicha grant loyihasini amalga oshirish to‘g‘risida bitim imzolandi.
Ta’kidlanishicha, 7 million yevroga teng grant shartnomasini imzolash marosimi 1-sentabr kuni YTTBning Londondagi shtab-kvartirasida bo‘lib o‘tdi. 2021-yilda Davlat ekologiya qo‘mitasi va YTTB o‘rtasida konsultativ yordam ko‘rsatilishi uchun 2 million yevro miqdoridagi birinchi bitim imzolangan edi. Jami 9 million yevro miqdoridagi grant loyihasi bank tomonidan Markaziy Osiyo uchun Atrof-muhitni reabilitatsiya qilish ekologik hisobi maxsus fondi hisobidan moliyalashtiriladi.
Grant loyihasi doirasida 2022–2025-yillar davomida maxsus uchastkalarini ekologik sog‘lomlashtirish va rekultivatsiya qilish tadbirlari amalga oshiriladi. Xolisona o‘tkazilgan ekspertiza hamda xavf-xatarlar va mahalliy sharoitlarni kompleks ekologik baholash asosida mutaxassislar hududni rekultivatsiya qilish, qurilish-montaj, izolyatsiya va himoya ishlarini olib borish bo‘yicha eng xavfsiz va maqbul variant va rejalarni tanlagan.
Rekultivatsiya ishlari 2023-yilning birinchi choragida boshlanishi rejalashtirilgan bo‘lib, taxminan ikki yil ichida yakunlanadi. Loyiha doirasidagi qurilish va reabilitatsiya ishlari mahalliy va germaniyalik mutaxassislar ishtirokida amalga oshiriladi.
