Buxoroda uy qurish uchun xususiy korxona yerini 16 ming dollarga sotmoqchi bo‘lgan shaxslar ushlandi

Buxoro viloyati Buxoro shahrida yana bir noqonuniy er oldi-sotdi qilish bilan bog‘liq jinoyat fosh etildi, deb xabar bermoqda Ichki ishlar vazirligi.

Qayd etilishicha, 4-avgust kuni o‘tkazilgan tezkor tadbirda Buxoro shahar “G‘oziyon” mahallasida yashovchi B.A. (1974-yilda tug‘ilgan) hamda Buxoro shahar Q.Murtazoyev ko‘chasida yashovchi I.I. (1973-yilda tug‘ilgan) ushlangan.

Ular oldindan til biriktirib Vobkent tumani “Rovkent” mahallasida yashovchi J.D. (1991-yilda tug‘ilgan)ni aldab, Kogon tuman “Beklar” mahallasi hududida joylashgan “Z.Ch.A.” xususiy korxonasiga tegishli bo‘lgan issiqxona yer maydonidan 0,15 ga bo‘lgan yer maydonini vakolatli tanishlari orqali uy-joy qurish uchun uning nomiga rasmiylashtirib berishni va’da qilib, ushbu yer maydonini 16 ming dollarga sotishga kelishgan. Buxoro shahar “Otbozor” mahallasi hududida oldindan kelishilgan puldan kimyoviy ishlov berilgan 10 ming dollarni olayotgan vaqtida ashyoviy dalillar bilan jinoyat ustida qo‘lga olingan.

Holat yuzasidan Jinoyat kodeksining 168-moddasi (firibgarlik) 4-qismi bilan jinoyat ishi qo‘zg‘atilgan. Hozirda dastlabki tergov harakatlari olib borilmoqda.