“Bolalarning xatna to‘yi qilindi, 131 ta kambag‘al oila farzandiga maktab forma olindi, 240 oilaga mol berildi”. Mirishkorda mustaqillik bayrami — suratlarda

Qashqadaryo viloyatining Mirishkor tumanida Mustaqillik bayrami arafasida 24 nafar bolaning xatna to‘yi o‘tkazildi, 80 ta kambag‘al oila farzandlariga maktab forma olib berildi. Bu haqda “Daryo”ga tuman hokimligi axborot xizmati rahbari Azizbek Yazdurdiyev xabar berdi.

Aytilishicha, tumanda mustaqillikning 31 yilligi “Yangi O‘zbekistonda el aziz, inson aziz” shiori ostida o‘tkazilmoqda.

“Tuman hokimi Sherali Sanayev tashabbusi bilan bayram arafasida 800 ga yaqin xonadonlarga shodlik ulashildi. Xususan, istiqlolning 31 yilligi arafasida ijtimoiy himoyaga muhtoj deb topilgan 24 ta oilaning 24 nafar farzandlarini sunnat to‘yi va bitta yosh oilaning nikoh to‘yi qilib berildi.

Shuningdek, 403 ta “Temir daftar”, “Ayollar daftari”, “Yoshlar daftari”ga kiritilgan hamda ko‘makka muhtoj oilalarga bayram dasturxoni uchun 8 xil turdagi oziq ovqat mahsulotlari yetkazib berildi.

“‘Ayollar daftari’dagi 51 ta oila farzandlariga, saxovat tadbiriga o‘z hissasini qo‘shishni istagan tuman tashkilotlari rahbarlarining ixtiyoriy tashabbuslari bilan 80 ta ehtiyojmand va kam ta’minlangan oila farzandlariga maktab formalari olib berildi”, — deydi hokimlik axborot xizmati rahbari Azizbek Yazdurdiyev.

Shuningdek, bayram arafasida homiy tadbirkorlar hisobidan 240 ta ehtiyojmand oilaga yirik shoxli hamda mayda shoxli mollar yetkazib berilgan.

“Bayram arafasida ‘O‘zbekiston’ mahallasida yashovchi 50 nafar yoshi ulug‘ keksalar uchun ko‘hna Xiva shahriga sayohat tashkil etildi”, — deydi hokimlik mas’uli.