«Болаларнинг хатна тўйи қилинди, 131 та камбағал оила фарзандига мактаб форма олинди, 240 оилага мол берилди». Миришкорда мустақиллик байрами — суратларда

Қашқадарё вилоятининг Миришкор туманида Мустақиллик байрами арафасида 24 нафар боланинг хатна тўйи ўтказилди, 80 та камбағал оила фарзандларига мактаб форма олиб берилди. Бу ҳақда «Дарё»га туман ҳокимлиги ахборот хизмати раҳбари Азизбек Яздурдиев хабар берди.

Айтилишича, туманда мустақилликнинг 31 йиллиги «Янги Ўзбекистонда эл азиз, инсон азиз» шиори остида ўтказилмоқда.

«Туман ҳокими Шерали Санаев ташаббуси билан байрам арафасида 800 га яқин хонадонларга шодлик улашилди. Хусусан, истиқлолнинг 31 йиллиги арафасида ижтимоий ҳимояга муҳтож деб топилган 24 та оиланинг 24 нафар фарзандларини суннат тўйи ва битта ёш оиланинг никоҳ тўйи қилиб берилди.

Шунингдек, 403 та «Темир дафтар», «Аёллар дафтари», «Ёшлар дафтари»га киритилган ҳамда кўмакка муҳтож оилаларга байрам дастурхони учун 8 хил турдаги озиқ овқат маҳсулотлари етказиб берилди.

«‘Аёллар дафтари’даги 51 та оила фарзандларига, саховат тадбирига ўз ҳиссасини қўшишни истаган туман ташкилотлари раҳбарларининг ихтиёрий ташаббуслари билан 80 та эҳтиёжманд ва кам таъминланган оила фарзандларига мактаб формалари олиб берилди», — дейди ҳокимлик ахборот хизмати раҳбари Азизбек Яздурдиев.

Шунингдек, байрам арафасида ҳомий тадбиркорлар ҳисобидан 240 та эҳтиёжманд оилага йирик шохли ҳамда майда шохли моллар етказиб берилган.

«Байрам арафасида ‘Ўзбекистон’ маҳалласида яшовчи 50 нафар ёши улуғ кексалар учун кўҳна Хива шаҳрига саёҳат ташкил этилди», — дейди ҳокимлик масъули.