Argentinada ish haqini oshirish talabi bilan ommaviy namoyishlar bo‘lib o‘tmoqda (foto)

Argentina poytaxti Buenos-Ayresda minglab aholi ish haqini oshirish va inflyatsiyani pasaytirish talabi bilan ko‘chaga chiqdi, deb yozmoqda Reuters.

Namoyishchilar Kasa Rosada prezident saroyi va Kongress binosi tomon yo‘l olgan, poytaxtning asosiy xiyobonlari bo‘ylab harakatlangan. Ular kasaba uyushmalari bayroqlarini ko‘tarib, nog‘oralar chalgan.

Argentinaliklar hukumatni ish haqini inflyatsiyaga mos ravishda oshirishga, shuningdek, iqtisodiy muammolarni bartaraf etish uchun ijtimoiy xarajatlarni ko‘paytirishga chaqirdi.

“Biz inflyatsiyaning bunday darajasida davom eta olmaymiz, har kun ish haqimizning ma’lum qismini yo‘qotyapmiz”, — dedi CGT ishchilar kasaba uyushmasi rahbari Pablo Moyano.

Moyano olomon oldida nutq so‘zlab, prezident Alberto Fernandesdan narxlarni nazorat ostiga olish va 70 foiz atrofida bo‘lgan yillik inflyatsiyaga yechim topishni so‘radi.

Mavzuga doir: Britaniyada transport xodimlari ommaviy ish tashlashni boshladi