Turkiya Shvetsiya va Finlyandiyani NATOga a’zo bo‘lish borasidagi va’dalarini bajarmaganlikda aybladi

Turkiya tashqi ishlar vaziri Mavlut Chavusho‘g‘lining matbuot anjumanida aytishicha, Shvetsiya va Finlyandiya Anqara tomonidan NATOga a’zo bo‘lish bo‘yicha qo‘yilgan talablarni haligacha bajarmagan. Bu haqda Turkiyaning Anadolu agentligiga tayanib, “RBK” xabar bermoqda.

Vazir Anqaraning Xelsinki va Stokgolm bilan tuzgan kelishuvini eslatdi. Unga ko‘ra, ular terrorchi deb hisoblagan Kurdiston ishchilar partiyasi (KIP) a’zolarini Turkiyaga ekstraditsiya qilishlari, uning tuzilmalariga aloqador barcha tashkilotlarni yopishlari va Anqaraga bu xususda kafolat berishlari kerak.

Mamlakat, o‘z navbatida, bu davlatlarning NATOga kirishiga to‘sqinlik qilmaslik majburiyatini oldi. Biroq Turkiya tomoni Shvetsiya va Finlyandiyaning bu yo‘nalishda hech qanday qadam tashlaganini haligacha ko‘rmadi, degan u.

Davlatning NATOga a’zo bo‘lishi uchun uni tashkilotning boshqa barcha faol a’zolari ma’qullashi kerak. Biroq Turkiya, Xelsinki va Stokgolm talablarini bajarmaguncha bunga yo‘l qo‘ymasligini bildirdi.

Iyun oyi oxirida Turkiya prezidenti Rajab Toyyib Erdo‘g‘on finlyandiyalik hamkasbi Sauli Niinistyo va Shvetsiya bosh vaziri Magdalena Andersson bilan uchrashib, bu borada ular bilan kelishib olgan. O‘shanda prezident ular Turkiyaning va’dalarini bajarganidan keyingina, mamlakatlar arizalarini ratifikatsiya qilishiga aniqlik kiritgan edi.

Mavzuga doir: Erdo‘g‘on Shvetsiya va Finlyandiyadan NATOga kirish uchun o‘z qonunlarini o‘zgartirishni talab qildi