Toshkent aeroportidagi savdo maydonlari ijarasi bo‘yicha auksionlar yakunlandi. Davom etayotgan savdolar ro‘yxati
Toshkent aeroportida “Taksi xizmatini tashkil etish” kimoshdi savdosi bilan birga yana bir qancha lotlar bo‘yicha auksionlar yakunlandi. Bu haqda “E-auksion” ma’lumot berdi.
Taksi xizmatini tashkil etish bo‘yicha kompaniya uch yildan ortiq bo‘lmagan benzinli avtomashinalar parkiga, shuningdek, kamida uch yillik tajribaga ega bo‘lgan haydovchilar tarkibiga ega bo‘lishi kerak edi.
Lotning yillik boshlang‘ich bahosi – 188,82 mln so‘m edi. 2-avgust kuni kimoshdi savdosida u 245,4 mln so‘mga “Bobur Diyor” oilaviy korxonasiga sotildi.
Shuningdek, aeroportdagi elektronika, gadjetlar va aksessuarlar sotish shoxobchasi ijarasining ham 2-avgustda auksioni bo‘lib o‘tdi.
Boshlang‘ich narxi 158 mln so‘m bo‘lgan ushbu obyekt ijarasi 1,6 mlrd so‘mga qo‘lga kiritildi. Kimoshdi savdosi g‘olibi — “Plug and play communications” bo‘ldi.
Umumiy ovqatlanish punkti va savdo avtomatlari uchun o‘tkazilgan auksion savdosi esa nizom talablariga asosan o‘tkazilmagan deb topildi.
Bir qator auksionlar esa davom etmoqda, xususan:
- Yo‘l o‘tkazgich ostidagi umumiy ovqatlanish punkti (JUM kafesi);
- Kitob do‘koni;
- Shirinlik do‘koni;
- Bolalar oziq-ovqat do‘koni,
- Zargarlik do‘koni;
- SIM kartalar va IMEI kodlarini ro‘yxatdan o‘tkazish shoxobchasi,
- Bankomat xizmatlarini ko‘rsatish joyining ijarasi.
Avvalroq Toshkent aeroportida taksi va boshqa xizmatlar uchun joylar ijarasi auksionga qo‘yilgani haqida xabar berilgandi.
