Тошкент аэропортидаги савдо майдонлари ижараси бўйича аукционлар якунланди. Давом этаётган савдолар рўйхати

Тошкент аэропортида «Такси хизматини ташкил этиш» кимошди савдоси билан бирга яна бир қанча лотлар бўйича аукционлар якунланди. Бу ҳақда «E-auksion» маълумот берди.

Такси хизматини ташкил этиш бўйича компания уч йилдан ортиқ бўлмаган бензинли автомашиналар паркига, шунингдек, камида уч йиллик тажрибага эга бўлган ҳайдовчилар таркибига эга бўлиши керак эди.

Лотнинг йиллик бошланғич баҳоси – 188,82 млн сўм эди. 2 август куни кимошди савдосида у 245,4 млн сўмга «Бобур Диёр» оилавий корхонасига сотилди.

Шунингдек, аэропортдаги электроника, гаджетлар ва аксессуарлар сотиш шохобчаси ижарасининг ҳам 2 августда аукциони бўлиб ўтди.

Бошланғич нархи 158 млн сўм бўлган ушбу объект ижараси 1,6 млрд сўмга қўлга киритилди. Кимошди савдоси ғолиби — «Plug and play communications» бўлди.

Умумий овқатланиш пункти ва савдо автоматлари учун ўтказилган аукцион савдоси эса низом талабларига асосан ўтказилмаган деб топилди.

Бир қатор аукционлар эса давом этмоқда, хусусан:

• Йўл ўтказгич остидаги умумий овқатланиш пункти (ЖУМ кафеси);
• Китоб дўкони;
• Ширинлик дўкони;
• Болалар озиқ-овқат дўкони,
• Заргарлик дўкони;
• SIM карталар ва ИМЕИ кодларини рўйхатдан ўтказиш шохобчаси,
• Банкомат хизматларини кўрсатиш жойининг ижараси.

Аввалроқ Тошкент аэропортида такси ва бошқа хизматлар учун жойлар ижараси аукционга қўйилгани ҳақида хабар берилганди.