Ўзбекистон товар-хом ашё биржаси хорижий ҳамкорлар, дунёнинг етакчи биржалари, халқаро молия ташкилотлари ва ишбилармонлари билан алоқаларни мустаҳкамлаш ҳамда хорижий савдо тармоғини кенгайтириш бўйича амалий ишларни давом эттирмоқда.
Товар-хом ашё биржаси Ўзбекистоннинг хориждаги элчихоналар билан биргаликда 5 та янги хорижий савдо майдончаларини очди.
Хусусан биржанинг хориждаги янги таянч офислари Россия, Туркия, Озарбайжон ва Тожикистон каби мамлакатларда ўз фаолиятларини бошлади.
Янги хорижий савдо майдончаларини очишдан кўзланган асосий мақсад биржа савдоларининг бозор механизмларидан фойдаланган ҳолда тадбиркорлар ва товар ишлаб чиқарувчиларнинг Ўзбекистон ва бошқа давлатларнинг товар бозорларига эркин киришини таъминлашдан иборатдир.
Хорижий савдо майдончаларнинг фаоллашуви натижасида 2022 йил январь—июль ойларида Ўзбекистон товар-хом ашё биржасида 120 дан зиёд янги норезидент мижозлар аккредитациядан ўтказилди ҳамда 257 млн долларлик ташқи савдо битимлари тузилди.
Мамлакатда озиқ-овқат хавфсизлигини таъминлаш ва ички бозорларда нарх-наво барқарорлигини сақлаш мақсадида ўтган даврда биржанинг савдо майдончалари орқали 483,4 минг тонна буғдой импорт қилинган бўлиб, бу ўтган йилнинг 7-ойига нисбатан 17 маротабага кўпдир.
Аввалроқ Ўзбекистонда доннинг бир қисми июль—сентябрь ойларида биржа савдолари орқали сотилиши белгилангани ҳақида хабар берилганди.
Изоҳ (0)