O‘zbekistonda ichki bozorda don narxlari barqarorligini ta’minlash maqsadida donning bir qismi 2022-yil iyul—sentabr oylarida birja savdolari orqali grafik asosida sotilishi belgilandi. Bu haqda Qonunchilik palatasidagi yig‘ilishda ma’lumot berildi.
Oliy Majlis Qonunchilik palatasida qishloq xo‘jaligi vaziri birinchi o‘rinbosari Sh.Teshayevning “O‘zbekiston Respublikasi qishloq xo‘jaligini rivojlantirishning 2020—2030-yillarga mo‘ljallangan strategiyasi bajarilishi bo‘yicha amalga oshirilayotgan ishlar to‘g‘risida”gi axboroti eshitildi.
Eshituvda qayd etilganidek, davlat rahbarining “G‘allani yetishtirish va sotishda bozor tamoyilini joriy etishning qo‘shimcha chora-tadbirlari to‘g‘risida”gi qarori bilan g‘allani sotib olish va sotish bozor narxlari asosida amalga oshirilishi yo‘lga qo‘yildi. Xususan, ichki bozorda don narxlari barqarorligini ta’minlash maqsadida donning bir qismi 2022-yil iyul—sentabr oylarida birja savdolari orqali grafik asosida sotilishi belgilandi.
Qayd etilganidek, oziq-ovqat xavfsizligi va ichki iste’molni sifatli qishloq xo‘jaligi mahsulotlari bilan kafolatli ta’minlash borasida 2022-yilning birinchi yarim yilligida 4 million 499 ming gektar yerga ekinlar ekildi. Respublikadagi qishloq xo‘jaligi korxonalarida 5,1 ming gektar maydonlarda 2 912 ta issiqxona faoliyat olib bormoqda. Shundan, 876 gektar gidroponika usulida, 4,2 ming gektar tuproqda mahsulot yetishtirishga ixtisoslashtirilgan bo‘lib, ularda 385 ming tonna mahsulotlar yetishtirildi.
Shuningdek, qulay agrobiznes muhitini va qo‘shilgan qiymat zanjirini yaratish maqsadida 14 ta paxta-to‘qimachilik, 41 g‘allachilik, 103 meva-sabzavotchilik klasterlari faoliyati yo‘lga qo‘yildi. Bugungi kunda 134 ta paxta-to‘qimachilik, 198 ta g‘allachilik, 249 ta meva-sabzavotchilik, 43 ta sholichilik, 9 ta dorivor o‘simliklar yetishtiruvchi klasterlar faoliyat yuritmoqda.
Izoh (0)