Наманганлик ота фарзанди учун алимент тўлови ўрнига ҳовли ажратиб берди. Бу ҳақда «Дарё» мухбири Азизбек Абдувалиев хабар бермоқда.
Чортоқ туманида яшовчи Мирмуҳсин Ўрозов (исм-шариф шартли) турмуш ўртоғи билан ажрашганидан сўнг бир нафар фарзанди она қарамоғида қолганди. Фуқаролик ишлари бўйича суд кўрсатмасига кўра бола учун алимент ундирилиши белгиланади.
МИБ Чортоқ туман бўлими ходимлари томонидан Мирмуҳсин Ўрозовга алиментни ўз вақтида тўлаш зарурлиги ёки фарзанди вояга етгунга қадар бир йўла тўлаб бериши мумкинлиги тушунтирилди. Шундан сўнг у боласи 18 ёшга тўлгунча бўлган тўловларни ҳисоб-китоб қилиб беришни сўраб мурожаат этди. Давлат ижрочиси томонидан бир нафар фарзанд учун 2026 йилга қадар ҳисобланган тўловлар 112 миллион сўмни ташкил этди.
«Масъулиятини англаган ота фарзанди учун алимент маблағи ўрнига 3 сотихдан иборат ҳовлини ажратиб берди», — дейилади МИБ Наманган вилоят бошқармаси хабарида.
Маълумот учун, бошқарма томонидан жорий йил 6 ойи давомида жами 44 миллиард сўм алимент пуллари ундирилди. Шунингдек, 1,8 миллиард сўм нақд пул, 287 миллион сўмлик уй-жойлар, 67 миллион сўмлик транспорт воситаси алимент олувчиларга олдиндан тўлов сифатида берилиши таъминланди.
Мавзуга доир: Марғилонлик ота икки нафар фарзанди учун алимент ўрнига уй берди
Изоҳ (0)