Xitoy Xalq ozodlik armiyasi Tayvan yaqinida jangovar o‘t ochish mashqlarini boshladi, deb xabar bermoqda Reuters agentligi mamlakat markaziy televideniyesiga tayanib. Mashg‘ulotlar 7-avgust, yakshanba tongiga qadar davom etadi. Ular doirasida Tayvan yaqinidagi suv hududlari va havoda jangovar o‘qlar uziladi.
Pekin ushbu mashg‘ulotlarni AQSH Kongressi Vakillar palatasi spikeri Nensi Pelosining Tayvanga tashrifi tufayli o‘tkazmoqda. Xitoy Xalq ozodlik armiyasi bu harakatlar Tayvan masalasida AQSH tomonidan yuzaga keltirilgan “yirik keskinlashuv”ga javob ekanini, bu “jiddiy tiyib turish” va orol mustaqilligi tarafdorlari uchun ogohlantirish bo‘lishini tushuntirdi.
2-avgust kuni Pelosi Tayvan parlamentiga tashrif buyurdi, prezident Say Inven bilan uchrashdi va orolni “dunyodagi eng erkin jamiyatlardan biri” deb atadi. Uning ta’kidlashicha, safaridan asosiy maqsad Tayvanning “jonli va dinamik” demokratiyasini qo‘llab-quvvatlashdir.
Xitoy hamda AQSH o‘rtasidagi munosabatlar Pelosining Tayvanga tashrifidan keyin yanada keskinlashdi. Pekin Vashingtonga “yagona Xitoy” prinsipiga rioya qilishni eslatgan, mazkur prinsipga ko‘ra Tayvan suverenitetga ega emas. AQSH siyosatchisining Tayvanga tashrifi XXR suverenitetining buzilishi deb baholanmoqda.
Xitoy harbiylarining mashg‘ulotlariga javoban Tayvanda jangovar shaylik darajasi oshirildi. Oq uy inqirozli vaziyat yaratmoqchi emasligi hamda Xitoy bilan ziddiyatga va “qilichbozlik”ga intilmasligini ta’kidladi.
“Pekinda Pelosining tashrifidan Tayvanga qarshi tajovuzkor harakatlarni kuchaytirish uchun bahona sifatida foydalanishga asos yo‘q”, — dedi Oq uy Milliy xavfsizlik kengashi strategik aloqalar bo‘yicha koordinatori Jon Kirbi. Uning so‘zlariga ko‘ra, Vakillar palatasi spikerining safari AQSHning “yagona Xitoy” konsepsiyasiga sodiqligiga zid emas.