O‘zbek shou-biznesining shunday vakillari borki, ular turmush o‘rtog‘ini o‘ziga tanish bo‘lgan insonlar safidan yoki hamkasblari orasidan emas, muxlislari orasidan topgan. “Daryo” muxbiri Nasiba Abduxamidova o‘zbek shou-biznesidagi o‘z muxlislari bilan turmush qurgan mashhurlar haqida ma’lumot beradi.
Sardor Toirov
Xonanda Sardor Toirovning to‘yi 2022-yilning 27-mart kuni, poytaxtdagi restoranlarning birida, o‘zbek shou-biznesining ko‘plab taniqli san’atkorlari ishtirokida bo‘lib o‘tdi. Xonanda o‘z rafiqasini muxlislari orasidan topgan. Uning rafiqasi Xumora Toirova turmush o‘rtog‘ining muxlisi bo‘lganini, klip uchun e’lon qilingan kasting sababli tanishib qolgani haqida gapirib berdi.
“Birinchi marta u kishini ammamning uyiga borganimda, 2017-yilda Bahrom Nazarovning konsertida chiqish qilganida ko‘rganman. Konsertdagi chiqishini qayta-qayta qo‘yib, 6 marta ko‘rganman. Ko‘ngil sezganmi, bilmadim. Keyin bir kuni qarindosh opam nashid aytgan bir bolani ko‘rsatgan, u kishi bilan nashid aytgan bola bir ekanini keyin bilganman. Nashid aytganini ko‘rganimda uni turk yoki arab millatiga mansub deb o‘ylaganman.
Oradan vaqt o‘tib (bu gaplarni ancha vaqtdan keyin aytib bergan) 2018-yil klipiga kasting e’lon qilgan, shunda mening ham rasmimni ko‘rsatishgan. U payt 14 yosh edim, tabiiyki, rejissorlar yoshligimni aytgan. Baribir dadam ham ruxsat bermas edi. Turmush o‘rtog‘imda rasmimni ko‘rib, iliqlik paydo bo‘lgan ekan, go‘yoki kimdir shu sening ayoling, deb aytayotgandek tuyulgan. Nomerimni topib saqlab qo‘ygan, biroq yozmagan. Shu bilan oradan bir yil vaqt o‘tdi, 2019-yil 1-dekabr soat kunduzgi 11:00 lar atrofida edi. Maktabda darsda edim, Instagram sahifamda 13 ta rasmim bo‘lsa, hammasiga layk bosgan, ko‘rib hayron bo‘lganman. Odatda u kishi kimgadir layk bossa, direct’iga minnatdorchilik bildirib yozishar ekan, mendan ham shuni kutgan ekan, biroq men yozmaganman. Bunday masalalarda juda ham sabrli inson, kutgan, oxiri direct’imga yozgan” , — deydi Xumora Toirova.
Sharof Muqimov
Sharof Muqimov o‘zining surxondaryolik muxlisi bilan turmush qurgan. Xonandaning turmush o‘rtog‘i Husnora ular konsertda tanishib qolganini, klip suratga olish jarayoni sabab munosabatlari yuzaga kelganini aytgan. Husnora Sharof Muqimovning muxlisasi bo‘lgan. Juftlik turmush qurganiga qadar sinovlardan o‘tgan. Ularning birinchi farzandi — Shavkatov Toxirjon 2021-yilning 19-dekabr kuni dunyoga kelgan.
“Ummon” guruhining sobiq a’zosi Shohrux
“Ummon” guruhining sobiq a’zosi Shoxruh MY5 telekanalining “Omon-omon” ko‘rsatuviga bergan intervyusida rafiqasini Instagram orqali topgani, turmush o‘rtog‘i uning muxlisi bo‘lgani va musiqalarini yaxshi ko‘rib tinglagani haqida aytgan.
“To‘yimiz 2016-yil bo‘lgan, biz esa 2013-yil tanishganmiz. Turmush o‘rtog‘im u paytda kollejda o‘qirdi, jiyanimning kursdoshi bo‘lgan. Jiyanim sabab tanishib qolganmiz, bir kuni jiyanim kursdoshlari bilan tushgan suratini sahifasiga joyladi, shunda o‘sha rasmdan ko‘rib, yoqtirib qolganman. Shu qiz meniki bo‘ladi, deganman. Darrov jiyanimga telefon qilib, bu qizning kim ekanini so‘raganman. U esa kursdoshim, yaxshi qiz deb aytgan. Keyin tanishib, turmush qurganmiz. Ijodimdan xabardor bo‘lgan, musiqalarimni yaxshi ko‘rib tinglagan. Keyin bilsam, uning uyiga xizmatga borgan ekanmiz, menga rasmlarni tashlagan” , — deydi xonanda.
Davron Kabulov
“Million” kulgi jamoasining a’zosi, teleboshlovchi Davron Kabulov turmush qurishidan oldin 614 ta qizning nomzodini ko‘rib chiqqan. U “Muhabbat qissalari” ko‘rsatuviga bergan intervyusida turmush o‘rtog‘i uning muxlisi bo‘lgani haqida gapirgan.
“ ‘Afro‘z’ guruhining a’zosi Jamshidning to‘yida bitta qiz dugonalari bilan rasmga tushsak bo‘ladimi, deb oldimga kelgan. Bizni rasmga olayotgan qizga sen ham tushib ol, degan. Muxlisim bo‘lganini to‘ydan to‘rt oy o‘tib aytgan. Men sezmaganman buni, chunki uchrashgan paytlarimizda ham meni tanishiga ishonmaganman” , — deydi Davron Kabulov.
Dilnoza Kubayeva
Aktrisa Dilnoza Kubayevaning marhum turmush o‘rtog‘i uning “Kelgindi kelin” filmidagi rolini ko‘rib, g‘oyibona yoqtirib qolgan. Keyin esa aktrisadan dastxat olish uchun teatrga kelgan. Dilnoza Kubayeva turmush o‘rtog‘i bilan ko‘p yashamagan bo‘lsa ham, undan hamisha minnatdor bo‘lishini ta’kidlagan.
“Turmush o‘rtog‘im 30 yoshda vafot etdi. Shu insonning roziligi uchun vafotidan so‘ng ikki yil ijodiy tanaffus qildim. Chunki u inson shuni istagandi. Shukrki, Yaratgan oldida ham, o‘g‘lim oldida ham vijdonim toza”, — deydi aktrisa Dilnoza Kubayeva.
Mavzuga doir:
- Orzular amalga oshadi: Muxlislari bilan turmush qurgan mashhurlar (foto)
- Qismat dog‘i: turli sabablarga ko‘ra turmush o‘rtog‘idan bevaqt judo bo‘lgan o‘zbek shou-biznesi vakillari (foto, video)
- Qimorga tikilgan, oyog‘i sindirilgan va qornidagi bolasi tushirilgan: Turmush o‘rtog‘ining ruhiy va jismoniy zo‘ravonligiga uchragan o‘zbek shou-biznesi vakillari (foto)
- O‘z muxlisi bilan turmush qurgan rossiyalik mashhurlar (foto)
- “Turmush o‘rtog‘imning muxlisasi edim”. Sharof Muqimovning rafiqasi ular qanday tanishgani haqida gapirib berdi
Izoh (0)