Belarus SHHTga a’zo bo‘lish uchun ariza berdi

Belarus Shanxay hamkorlik tashkilotiga (SHHT) a’zo bo‘lish uchun ariza berdi, deya ma’lum qildi SHHT bosh kotibi Chjan Min. Uning so‘zlari tashkilotning Telegram kanalida keltirilgan.

“Belarus respublikasi SHHTga a’zo davlatlar qatoriga kirish uchun ariza berdi”, — deyiladi bayonotda.

Chjan Min, shuningdek, Eronga SHHTga a’zo davlat maqomini berish jarayoni nihoyasiga yetayotganini ta’kidladi.

Hozirda Belarus va Eron tashkilotda kuzatuvchi davlatlar hisoblanadi.

SHHTga O‘zbekiston, Qozog‘iston, Xitoy, Qirg‘iziston, Rossiya, Tojikiston, Pokiston va Hindiston kiradi. Belarus va Erondan tashqari, Afg‘oniston va Mo‘g‘uliston ham kuzatuvchi davlat, Ozarbayjon, Armaniston, Kambodja, Nepal, Turkiya va Shri-Lanka esa hamkor davlatlar hisoblanadi.

Eron 2008-yilda SHHTga a’zo bo‘lish uchun ariza bergan. Biroq 2015-yilgacha tashkilot BMT Xavfsizlik Kengashi tomonidan unga kiritilgan sanksiyalar tufayli respublikani o‘z safiga qabul qila olmagan, cheklovlar olib tashlanganidan so‘ng esa, jarayonga AQSHning Yadro bo‘yicha Qo‘shma keng qamrovli harakatlar rejasidan chiqishi to‘sqinlik qildi.

Mavzuga doir: SHHT Mintaqaviy antiterror tuzilmasi ijroiya qo‘mitasi Qoraqalpog‘istondagi voqealarga munosabat bildirdi