Birlashgan Millatlar Tashkiloti Bosh assambleyasi prezidentining rasmiy vakili Polina Kubiak Ukraina prezidenti Vladimir Zelenskiyning Rossiyani tashkilot Xavfsizlik kengashidan chiqarib tashlash haqidagi chaqirig‘iga javob qaytardi. Bu haqda “RIA Novosti” xabar berdi.
Kubiak bunday qarorlarning barchasi Xavfsizlik Kengashi orqali qabul qilinishini eslatdi. Unga ko‘ra, bunday qarorni qabul qilish mumkin emas, chunki Rossiya kengashda veto huquqiga ega.
Rossiyaning BMT Xavfsizlik Kengashida doimiy a’zo sifatida ishtirok etishi tashkilot nizomining 23-moddasida ko‘rsatilgan. Nazariy jihatdan uni istisno qilish uchun ushbu hujjatga tuzatish kiritish kerak. Shundan keyin ham hujjat kengashning barcha doimiy a’zolari tomonidan imzolanganidan keyingina qabul qilinishi mumkin.
Zelenskiy 28-iyun kuni BMT Xavfsizlik kengashi yig‘ilishida videoaloqa orqali so‘zlagan nutqida Rossiyani kengashdan chiqarib yuborish, shuningdek, uni “terrorchi davlat” deb tan olishga chaqirdi. Zelenskiyning so‘zlariga ko‘ra, Rossiya “Ukrainadagi hech qanday sababsiz va mustamlakachilik xarakteri bilan olib borilayotgan urush masalalarini kengashda muhokama qilishda va ovoz berishda ishtirok etish huquqiga ega emas”.
Zelenskiy Rossiyani BMT Xavfsizlik kengashidan chiqarib tashlashni avval ham taklif qilgan edi, aks holda, uning fikricha, organ o‘zini o‘zi tarqatib yuborishi kerak
Izoh (0)