“PSJ” hujumchisi Neymar “Barselona”ga taklif qilindi. Bu haqida jurnalist Xose Alvares xabar berdi.
Kataloniya klubiga hujumchini 50 million yevro evaziga sotib olish taklif qilingan. Bu yakuniy narx emas, savdolashish mumkin bo‘ladi.
“Barselona”ga “PSJ” vositachilaridan qo‘ng‘iroq bo‘lgan. Kataloniya jamoasi prezidenti Xoan Laporta bilan yaqin munosabatda bo‘lgan Pini Zahavi ulardan biri. Aynan Zahavi Levandovskini “ko‘k-anorranglilar” tarkibiga o‘tish ishlarida bosh-qosh bo‘lmoqda.
“Barselona”ga Neymarni ushbu yozda 50 million yevroga sotib olishi mumkinligi, bu narxni yana muhokama qilish imkoniyati borligi xabar qilingan. Muzokaralarda ham muammo bo‘lmasligi aytilgan. Neymar ham katalonlar safiga qaytishga qarshi emas. U “PSJ”dan ketgan taqdirda ham faqat “Barselona” safiga borib qo‘shilishni xohlaydi. Braziliyalik hujumchi “ko‘k-anorranglilar”ga bir necha bor taklif qilingan.
Hozirda Xavi jamoasi bor e’tiborini Levandovski transferiga qaratgan, ammo Laportaning Pini va Neymar bilan munosabatlari yaxshiligini hisobga olib, braziliyalikka loyiha yetakchisi roli ishonib topshirishi mumkin.
Avvalroq “PSJ”ning qatarlik xo‘jayinlari hujumchining jamoadan ketishini xohlayotgani xabar qilingandi.
Neymar 2017-yildan buyon parijliklar sharafini himoya qilib keladi. “PSJ” hujumchi uchun “Barselona”ga 222 million yevro to‘lab bergan edi. Braziliyalikning amaldagi shartnomasi 2025-yilda o‘z nihoyasiga yetadi.
Braziliyalik 2021/22-yilgi mavsum “PSJ” safida barcha musobaqalarda 28 ta o‘yinda ishtirok etib, 13 ta gol va 8 ta golli uzatmaga mualliflik qildi.
Izoh (0)